Barði þungaða konu með kylfu

Kona í Pennsylvaníu í Bandaríkjunum barði þungaða nágrannakonu sína með hafnaboltakylfu í höfuðið, ók með hana út í skóg og reyndi að skera á kvið hennar til að ná ófæddu barninu út. 17 ára gamall piltur sem leið átti hjá er talinn hafa fælt konuna frá en hann hringdi á lögreglu sem handtók hana. Þungaða konan, sem er þrítug að aldri, gekkst undir keisaraskurð á sjúkrahúsi á eftir. Konan, sem var komin sjö mánuði á leið, er þungt haldin en barninu líður vel. Árásarkonan hafði sagt sambýlismanni sínum að hún væri ófrísk en saksóknarar segja ekkert benda til þess að hún sé með barni.