Misnotuðu 45 börn

Réttarhöld hófust í gær í Angers í Frakklandi yfir 66 manns sem eru grunaðir um að hafa misnotað 45 börn og þvingað þau til vændis. Dómsmálið er hið stærsta sinnar tegundar í franskri réttarsögu en brotin stóðu yfir á árunum 1999-2002. Saksóknarar segja að foreldrar barnanna hafi nauðgað þeim og boðið vinum sínum að gera slíkt hið sama. Elstu börnin voru fjórtán ára gömul þegar brotin komust upp en þau yngstu voru aðeins sex mánaða. Fórnarlömbin þurfa ekki að bera vitni í dómssal því saga þeirra var tekin upp á myndband. Lýsingarnar sem þar koma fram eru svo hroðalegar að dómararnir hafa þegið áfallahjálp eftir að hafa hlýtt á vitnisburð barnanna. Einni stúlkunni var að sögn nauðgað í 45 skipti. Margir sakborninganna koma úr fátækrahverfi Angers og sumir þeirra segjast sjálfir hafa verið misnotaðir í æsku. Einhverjir þeirra kunna ekki að lesa og skilja ekki hvað þeim er gefið að sök. Verjendur sakborninganna kenna félagsmálayfirvöldum um að hafa ekki orðið misnotkunarinnar vör. Allt að þrjátíu ára fangelsisvist bíður fólksins verði sekt þess sönnuð.