Fuglaflensan komin til Grikklands

Grísk yfirvöld greindu frá því í gær að fuglaflensu hefði orðið vart í landinu í fyrsta sinn. Sérfræðingar Alþjóðaheilbrigðismálastofnunarinnar WHO búast við að pestin haldi áfram að breiðast út. Fyrstu fuglaflensutilfellin hafa greinst í grískum fiðurfénaði en stjórnvöld í Grikklandi skýrðu frá því í gær að kalkúnar á búgarði á Víney í Eyjahafi, skammt frá Tyrklandi, hefðu drepist úr pestinni. Ekki liggur fyrir hvort flensan sé af H5N1-stofninum illvíga en niðurstöður rannsókna munu liggja fyrir á næstu dögum. Á síðustu vikum hefur veikin fundist í tyrkneskum og rúmenskum fuglum. Þá sögðu sérfræðingar WHO í samtali við blaðamenn í gær að engin spurning væri um að fuglaflensan héldi áfram að breiðast út. Þeirra helsta áhyggjuefni er hins vegar hvort H5N1-veiran stökkbreytist þannig að hún geti smitast manna á milli. Vandamálið er alvarlegast í Asíu þar sem nánast má tala um fuglaflensufaraldur. Við slíkar aðstæður er hættan mest á stökkbreytingu. Í gær hrósuðu embættismenn á vegum Evrópusambandsins tyrkneskum stjórnvöldum fyrir árangursríkar aðgerðir þegar flensan greindist þar og sögðu engar vísbendingar um að íbúum svæðisins þar sem veikin kom upp stafaði hætta af henni.