Vilja Íran úr SÞ

Ísraelsk stjórnvöld krefjast þess að Írönum verði vísað úr Sameinuðu þjóðunum vegna ummæla forseta landsins um að þurrka ætti Ísrael út af landakortinu. Ummælin hafa víða verið fordæmd.

Mahmoud Ahmadinejad, forseti Írans, lét orðin falla á fundi í Teheran, þar sem yfirskriftin var "Heimurinn án síonisma" og sagði hann að hver sá, sem skrifaði undir viðurkenningu á Ísraelsríki, hefði skrifað undir uppgjöf hins íslamska heims. Íranar neita að viðurkenna Ísraelsríki og styðja aðgerðir uppreisnarhópa Palestínumanna. Forseti Írans sagði að þurrka ætti ísrael út af landakortinu og að hinn íslamski heimur gæti aldrei sætt sig við að þessi óvinur byggi á landi þeirra. Ísraelsk stjórnvöld hafa brugðist harkalega við ummælunum.