Varar við hættu á berklafaraldri

Hætta er á að berklafaraldur brjótist út í Norður-Evrópu vegna lyfjaónæmra berkla sem komið hafa upp í héraðinu Arkhangelsk í Norðvestur-Rússlandi. Þetta segir Jan Henrik Fredriksen, fulltrúi noskra Framfaraflokksins, en hann vakti athygli á málinu í umræðum um norðursvæðin á Norðurlandaráðsþinginu sem nú er haldið í Reykjavík.

Fredriksen bendir á að um 400 manns í Arkhangelsk-héraði séu með berkla sem engin lyf vinna á. Jafnframt séu 70.000 alnæmissmitaðir í Norðvestur-Rússlandi. Þetta verði ríki á norðurslóðum að taka mjög alvarlega.

Á þinginu spurði Fredriksen hvernig samstarfið milli Norrænu ráðherranefndarinnar og Barentsráðsins yrði en fékk engin svör. Hann lagði til að sett yrði á laggirnar öflugra og betra samræmt samstarf milli þátttakenda í Barentshafssamstarfinu og ráðherranefndarinnar til að berjast gegn dreifingu HIV-veirunnar og berkla.