Ríkustu þjóðirnar hafa brugðist

Sameinuðu þjóðirnar fara nú fram á að ríki heims leggi fórnarlömbum jarðskjálftans í Kasmír til tvöfalda þá upphæð sem stofnunin bað fyrst um. Mörg af ríkustu löndunum hafa ekkert látið af hendi rakna.

"Þessar hörmungar eru alvarlegri en við gátum nokkurn tímann ímyndað okkur," sagði Kofi Annan á ráðstefnu styrktarríkjanna í Genf í gær. Sameinuðu þjóðirnar telja nú nauðsynlegt að þau leggi fram 35 milljarða króna og það sem sem allra fyrst. Himalaya-veturinn er skammt undan og berist ekki þeim 3,3 milljónum manna sem eru heimilislaus hjálpargögn á næstunni er víst að mun fleiri munu látast í Kasmír en þeir 79.000 sem þegar eru taldir af.

Bresku góðgerðarsamtökin Oxfam birtu hins vegar skýrslu í gær þar sem fram kemur að mörg af auðugustu ríkjum heims, til dæmis Frakkland, Finnland og Spánn, hafa ekkert gefið og ríki á borð við Bandaríkin, Japan og Þýskaland gætu staðið sig mun betur. Einungis fimmtungur þeirrar upphæðar sem SÞ hafa farið fram á hefur borist.

Hjá íslenska utanríkisráðuneytinu fengust þær upplýsingar að þegar hafi 300.000 dölum, eða um átján milljónum króna, verið varið til neyðaraðstoðar til fórnarlambanna. Ekki hefur verið ákveðið hvort aukið verði við þá upphæð.