Harmsaga harðjaxlsins blinda

Í síðustu viku sagði einn litríkasti stjórnmálamaður Bretlands, David Blunkett, af sér ráðherraembætti í annað sinn á einu ári.

Braust áfram af eigin rammleik

Dapurleg bernska Blunkett gæti allt eins verið úr bók eftir Charles Dickens. Þegar hann fæddist árið 1947 kom í ljós að hann var blindur, hann var settur á heimavistarskóla fjögurra ára gamall og átta árum síðar lést faðir hans þegar hann féll ofan í tank fullan af sjóðandi vatni í verksmiðju.

Engu að síður tókst Blunkett að brjótast áfram af eigin rammleik. Aðeins 22 ára varð hann borgar­áðsmaður í Sheffield og árið 1987 varð hann svo þingmaður Verkamannaflokksins í Sheffield Brightside. Þegar flokkurinn komst í ríkisstjórn árið 1997 varð Blunkett menntamálaráðherra en 2001 færði hann sig svo um set og settist í stól innanríkis­ráðherra. Hann þótti harður í horn að taka og sú gagnrýni sem hann hlaut fyrir óbilgirnina virtist ekki bíta á hann heldur þvert á móti virtist hann hafa gaman af því að taka á "airy, fairy, libertarians," eða frjálslyndum vindhönum.

Tvöfalt fall

Í desember 2004 varð Blunkett hins vegar að segja af sér þegar upp komst að hann hafði hraðað umsókn barnfóstru Kimberly Quinn, ástkonu sinnar, um vegabréfsáritun. Samband þeirra fór svo út um þúfur og í kjölfarið hófst bitur deila um hvort Blunkett væri faðir tveggja drengja sem hún hafði eignast á meðan þau voru saman. Blunkett settist aftur í ríkisstjórn Blairs eftir kosningarnar í vor, þá sem ráðherra atvinnu- og lífeyrismála, en í síðustu viku varð hann að segja af sér vegna þess að honum láðist að greina frá tekjum og hagsmunatengslum sínum þegar hann var á milli ráðherraembætta.