Lífvörður Rabins vill nýja rannsókn

Öryggisvörður Yitzhak Rabin, forsætisráðherra Ísrael, vill að rannsókn verði hafin á morðinu á honum á nýjan leik. Í gær voru tíu ár liðin frá því að nóbelsverðlaunahafinn var skotinn til bana. 4. nóvember 1995 skaut Yigal Amir, öfgahægrimaður úr hópi gyðinga, Rabin þar sem hann hann flutti ávarp á friðarsamkomu í Tel Aviv.

Á valdatíma Rabins horfði mjög í friðarátt fyrir botni Miðjarðarhafs en hann gegndi lykilhlutverki að svonefnd Óslóarsamkomulag varð til þar sem Ísraealar viðurkenndu rétt Palesínumanna til að stjórna herteknu svæðunum svonefndu.

Í sjónvarpsviðtali í gær ræddi Dror Yitzhaki, helsti lífvörður Rabins, um morðið í fyrsta sinn í tíu ár. Yitzhaki kvaðst bera ábyrgð á að ekki hafi tekist að koma í veg fyrir tilræðið enda þótt urmull öryggisvarða hefði verið á svæðinu. Enginn þeirra hreyfði hins vegar legg eða lið fyrr en banamaður Rabins hafði lokið sér af.

Í viðtalinu greindi Yitzhaki frá því að fimm mánuðum fyrir tilræðið hefði leyniþjónustu hersins borist upplýsingar um að "lítill Jemeni" hefði í hyggju að myrða Rabin en Amir var af jemenskum ættum. Ekkert var hins vegar gert með þær upplýsingar. Þar sem greinilega á enn eftir að svara ýmsum spurningum um málið kvaðst Yitzhaki telja að taka ætti upp málið á ný.