Kvaðst vera vitorðsmaður

Breska lögreglan handtók um helgina mann sem viðurkenndi í blaðaviðtali að hafa verið í vitorði með mönnunum sem myrtu 52 í sprengjuárásum í Lundúnum 7. júlí. Sunnudagsblaðið News of the World greindi frá því í gær að lögregla í Dewsbury í Vestur-Jórvíkurskíri hefði í fyrradag handtekið Imran Patel eftir ábendingu frá ritstjórn blaðsins, en Patel hafði viðurkennt í samtali við blaðamann að hafa átt að taka þátt í hryðjuverkaárásunum.

Að eigin sögn bað Mohammad Sidique Khan, leiðtogi árásarmannanna, Patel um að slást í hóp þeirra og hittist allur hópurinn á heimili þess síðarnefnda til ­skrafs­­ og ráðagerða. Patel ákvað hins vegar að hætta við þátttöku þegar honum var sagt að barnaskóli ætti að vera eitt skotmarkanna. Engu að síður gerði hann lögreglu ekki viðvart þar sem hann vildi ekki koma félögum sínum í fangelsi. Talsverður viðbúnaður var í Dewsbury þegar maðurinn var handtekinn og var gerð húsleit á nokkrum heimilum í tengslum við málið. Patel er sá eini sem er í haldi vegna árásanna en fjórmenningarnir sem frömdu þær dóu allir í þeim.