Segist hafa fundið Atlantis

Bandarískur verkfræðingur sem hefur leitað hins horfna meginlands, Atlantis, í tíu ár, segist nú loksins hafa fundið það. Samkvæmt þjóðsögunni sem meðal annars er byggð á skrifum gríska heimspekingsins Platós, var Atlantis háþróað menningarþjóðfélag sem sökk í sæ, þegar guðirnir reiddust íbúunum fyrir græðgi þeirra. Robert Sarmas hefur leitað að Atlantis í tíu ár og segist nú hafa fundið mannvirki, á hafsbotni, sem passi nákvæmlega við lýsingu Platós, á borgarvirkinu í Atlantis. Þessi mannvirki sem Sarmast kallar svo eru á eins og hálfs kílómetra dýpi, um áttatíu kílómetra suðaustur af Kýpur. Hann vonast til þess að geta farið í annan leiðangur til þess að rannsaka rústirnar frekar. Ekki eru allir vísindamenn sannfærðir um að Sarmast hafi fundið Atlantis. Danskur fornleifafræðingur talaði líklega fyrir munn margra þegar hann sagði: "Já, já, og Marsbúar byggðu píramídana."