Gengu út af friðarfundi

Súdanskir uppreisnarmenn sögðu samningamenn stjórnvalda ekki reiðubúna að koma til móts við kröfur sínar og gengu því á dyr. Vonir stóðu til að viðræðurnar yrðu til að binda endi á borgarastríð í Darfurhéraði sem hefur kostað tugi þúsunda lífið og hrakið yfir milljón manns á flótta. "Þessum viðræðum er hér með lokið," sagði Ahmed Hussain Adam, fulltrúi Réttlætis- og jöfnuðarhreyfingarinnar, annarrar tveggja hreyfinga uppreisnarmanna sem voru viðstaddar viðræðurnar. Búist var við að Frelsishreyfing Súdans myndi einnig hætta þátttöku í viðræðunum.