Lítill árangur á AIDS-ráðstefnu

Alþjóðlegu alnæmisráðstefnunni í Bangkok á Tælandi er lokið án þess að nokkur teljandi árangur hafi náðst. Nelson Mandela, fyrrverandi forseti Suður-Afríku, sendi Bandaríkjamönnum tóninn þegar hann hvatti ríki heims til að taka saman höndum og leggja milljarða dollara í þróun lyfja og forvarnir. Þó að hvorki hafi verið kynntar nýjar leiðir í baráttunni gegn sjúkdómnum, né sérstakur árangur hafi náðst að öðru leyti, hefur ráðstefnan beint kastljósinu að alnæmisvánni í Afríku og Asíu. Þar er um hreinan faraldur að ræða sem hefur stórfelld áhrif á lífsgæði og þróun. Á meðfylgjandi mynd sést Mandela á tali við Sonju Gandhi, stjórnmálaleiðtoga á Indlandi, á ráðstefnunni í morgun.