Fyrsta stjórnarskrá ESB

Leiðtogar Evrópusambandsríkja náðu í gærkvöld samkomulagi um fyrstu stjórnarskrá sambandsins. Ekki tókst að tilnefna næsta forseta framkvæmdastjórnarinnar, sem á að taka við af Romano Prodi, en nú síðdegis sagðist Javier Solana, utanríkismálastjóri Evrópusambandsins, reiðubúinn að taka starfið að sér, yrði til hans leitað. Eftir endalausar samningaviðræður og málamiðlanir, höfðu leiðtogar Evrópusambandsríkja ástæðu til að fagna í gærkvöld, þegar þeir náðu langþráðu samkomulagi um fyrstu stjórnarskrá sambandsins. Á meðal helstu breytinga er að tekinn er upp svokallaður tvöfaldur meirihluti í atkvæðagreiðslum, þannig að minnst fimmtán ríki þurfa að samþykkja ný lög, auk þess sem íbúafjöldi í ríkjunum 15 verður að vera 65% af hinum 450 milljónum sambandsins. Þá verður hægt að synja lögum ef fjögur ríki með 35% heildaríbúafjölda eru því samþykk. Þetta þýðir að stærstu ríkin geta auðveldlega tekið sig saman og synjað lögum, ef fjögur þeirra eru sammála. Jaques Chirac, forseti Frakklands, segir það þessu samkomulagi að þakka að Evrópa verði skilvirkari og bregðist betur við þörfum íbúanna. Auk þess verði álfan áhrifameiri í heiminum. Þótt stjórnarskráin sé nú samþykkt af þeirra hálfu, bíða næg verkefni leiðtoganna. Fyrst þarf að finna arftaka Romano Prodis, forseta framkvæmdastjórnarinnar, en því var frestað í gær og er málið í algerri pattstöðu. Síðan á eftir að koma í ljós hvort íbúar aðildarríkjanna samþykki hina nýju stjórnarskrá, sem borin verður undir þjóðaratkvæði í flestum aðildarríkjum. Tony Blair telur að Bretar hafi náð fram helstu markmiðum sínum og hvetur landa sína þegar í stað til að samþykkja stjórnarskrána. „Það er ekkert málefni í umræðunni þar sem Bretland hefur verið einangrað á móti öðrum Evrópulöndum. Það sem skiptir máli fyrir þessa ólíku sýn á Evrópu, þegar við eigum þessa bandamenn, er að halda áfram að leika hlutverk okkar,“ sagði Blair á blaðamannafundi í dag.