Hryðjuverkastarfsemi trufluð

Bandaríkjastjórn telur að komið hafi verið í veg fyrir áform al Kaída um árásir á Bandaríkin, bæði með nýlegum handtökum grunaðra hryðjuverkamanna í Pakistan og Bretlandi og með því að leggja hald á tölvugögn um fimm fjármálastofnanir í Bandaríkjunum. "Ég tel vissulega að okkur hafi tekist að trufla þetta með aðgerðum okkar núna," sagði Francois Fragos Townsend, öryggisráðgjafi Bandaríkjaforseta. "Spurningin er sú, hvort við höfum raskað öllum þessum áformum eða einungis hluta þeirra. Og við erum að vinna að rannsóknum til þess að svipta hulu af því." Í gær fékk lögreglan í Bretlandi heimild til að framlengja fram á þriðjudag yfirheyrslur yfir níu mönnum, sem handteknir voru í Bretlandi í síðustu viku grunaðir um hryðjuverkastarfsemi. Alls voru þrettán menn handteknir í Bretlandi, en fjórum þeirra hefur verið sleppt.