Stærstur hluti launþega með lausa samninga

Kjarasamningar aðildarfélaga Alþýðusambands Íslands og Samtaka atvinnulífsins sem undirritaðir voru 17. febrúar 2008 renna út í dag.

Þetta þýðir að lang stærstur hluti launamanna á almennum vinnumarkaði verður með lausa samninga. Kjarasamningur sjómanna rennur svo út um áramótin. Í frétt á vef ASÍ segir að Landssambönd og félög innan ASÍ hafa frá því í haust verið að móta kröfugerð fyrir komandi kjarasamninga og mun Starfsgreinasambandið kynna SA kröfugerð sína þann 6. desember.

Formenn aðildarfélaga Starfsgreinasambandsins komu saman til fundar í gær og var þar nánast lögð lokahönd á kröfugerðina. Björn Snæbjörnsson, formaður Einingar-Iðju og formaður samninganefndar Starfsgreinasambandsins, segir að aðeins eigi eftir að fínpússa nokkra hluti áður en kröfugerðin verði kynnt á mánudaginn.

Samkvæmt upplýsingum frá BSRB munu stór hluti þeirra samninga sem aðildarfélög BSRB hefur gert við hið opinbera einnig renna út nú um mánaðamótin.