Árið fer skart af stað hjá lögreglu

Nýja árið heilsar lögreglunni á höfuðborgarsvæðinu með önnum. Upp úr hádegi var karlmaður handtekinn í Kópavogi en hans hefur verið leitað. Hann er eftirlýstur vegna vangoldinna sekta. Mun hann þurfa að dvelja í fangelsi eitthvað frameftir á nýju ári. Um hálf tvö var tilkynnt um skemmdarverk í Hólabrekkuskóla. Þar hafði rúða verið brotin með einhverskonar sprengju. Ekki er vitað um gerendur.

Áramótin á myndskeiði

Baldur Hrafnkell, myndatökumaður Stöðvar 2, brá sér á kreik í gærkvöldi og filmaði kveðjur Íslendinga til liðins árs og sprengjuæðið sem mætti hinu nýja þegar það gekk í garð. Þar má sjá Hallgrímskirkjuturn í marglitu neistaregni, börn með stjörnuljós, fólk að brosa og fólk með vín í flöktandi bjarma áramótabrennu. Yfir öllu saman glymur svo gamalkunnugt skátalag og gleðin er við völd.

Yfirvöld í Norður-Kóreu boða hagsæld í áramótaávarpi

Þegnar Norður-Kóreu eru hvattir til að sameinast og vernda nýskipaðann leiðtoga landsins, Kim Jong-Un. Í áramótaávarpi yfirvalda í Norður-Kóreu kemur fram að stjórnvöld þar í landi muni stemma stigum við matarskorti í landinu ásamt því að auka umsvif hersins.

Ekkert banaslys á sjónum

Nú við áramót hefur þeim merka áfanga verið náð í annað sinn í sögunni að ekkert banaslys hefur orðið meðal íslenskra sjómanna á árinu sem er að líða. Síðast gerðist það árið 2008. Í tilkynningu frá Landsbjörgu segir að ljóst sé að öryggi íslenskra sjómanna hafi aukist til mikilla muna sem og öryggisvitund þeirra, sem hafa tekið miklum stakkaskiptum á síðustu áratugum. Má með sanni segja að starf Slysavarnaskóla sjómanna í fræðslu til sjómanna um öryggismál hafi þar en og aftur sannað mikilvægi sitt.

Embætti forseta nú virkt afl í íslenskum stjórnmálum

Gunnar Helgi Kristinsson, stjórnmálafræðingur hjá Háskóla Íands, segir að embættistíð Ólafs Ragnars Grímssonar, forseta Íslands, muni hafa varanlegar breytingar í för með sér. Hann segir að Ólafur Ragnar hafi aukið völd forsetans til muna og gert embættið að virku afli í íslenskum stjórnmálum. Ekki sé hægt að útiloka það að næstu forsetar lýðveldisins muni beyta synjunarvaldinu á sama máta og Ólafur hefur gert.

Slapp við varanlegan augnskaða

Sjö ára drengur sem brenndist í nótt þegar hann fékk flugeld í andlitið hefur verið útskrifaður af Landspítalanum. Hann hlaut ekki varanlega áverka á augum, en brenndist nokkuð illa í andliti. Óhappið varð þegar hann og móðir hans stóðu álengdar og horfðu á aðra skjóta upp rakettum. Einn flugeldurinn fór ekki á loft heldur sprakk á jörðinni og drengurinn fékk glæður af honum í andlitið. Strákurinn var ekki með öryggisgleraugu. Af þessu óhappi má því draga þann lærdóm að jafnvel þó maður sjái ekki sjálfur um að kveikja í flugeldunum heldur standi til hliðar og fylgist með sé engu að síður vissara að hafa öryggisgleraugu á sér.

Ellefu Íslendingar sæmdir Fálkaorðu

Forseti Íslands sæmdi ellefu Íslendinga heiðursmerki hinnar íslensku fálkaorðu við hátíðlega athöfn á Bessastöðum í dag. Hér að neðan er listi yfir þá sem hlutu orðuna í dag. 1. Arnar Jónsson leikari, Reykjavík, riddarakross fyrir framlag til íslenskrar leiklistar. 2. Eymundur Magnússon bóndi, Vallanesi, riddarakross fyrir frumkvæði á sviði búskaparhátta og matvælamenningar.

Landsbjörg þakklát fyrir sýndan stuðning um áramótin

Framkvæmdarstjóri Landsbjargar segir flugeldasöluna fyrir áramót hafa gengið afar vel. Hann segir að salan í fyrra hafi verið góð og býst við því að hún hafi verið jafngóð fyrir áramótin.

Biskup segir landsdómsákæruna þjóðarsmán

"Gata hefnda og haturs er blindgata," sagði biskup Íslands, séra Karl Sigurbjörnsson í prédikun sinni í dómkirkjunni í morgun, og sagði að Landsdómsákæran "gegn einum manni væri vottur þess" að þjóðin hefði leiðst inn á slíkar ófærur. Hann sagði mikilvægt að lögsækja vegna afbrota og dæma hina seku, en þótti hins vegar umhugsunarvert ef menn væru "dæmdir" án dóms og laga með ofsafenginni og óvæginni umræðu. Hann bað fólk að huga að orðum sínum og láta af gífuryrðum og illmælgi á fréttamiðlum og bloggum.

Skotterta sprakk við jörðu í Breiðholti í gær

Íbúar í Vesturbergi í Breiðholti áttu fótum sínum fjör að launa í gærkvöldi þegar flugeldar skottertu sprungu án þess að takast á loft. Íbúi í Vesturbergi segir sprenginguna hafa verið ótrúlega sjón. Framkvæmdarstjóri Landsbjargar bendir fólki á að tilkynna slík atvik.

Ólafur telur ríkisvaldið of umsvifamikið

Forseti Íslands, herra Ólafur Ragnar Grímsson ávarpaði þjóð sína frá Bessastöðum í dag. Þar fór hann í stuttu máli yfir atburði liðins árs. Í upphafi komandi árs telur hann Ísland betur statt en ýmsar nágrannaþjóðir sínar sökum þess að Íslendingar gætu treyst á ríkulegar auðlindir.. "Ísland er að vissu leyti komið í var," sagði hann. "Þjóðin getur því átt í vændum betri kjör. Þá þurfum við að halda vel á málum, muna mistök okkar og draga af þeim lærdóm og loks hafa hugrekki til að feta nýja braut af ábyrgð."

Ólafur hyggst ekki bjóða sig fram aftur

Forseti Íslands, herra Ólafur Ragnar Grímsson, tilkynnti í nýársávarpi sínu að hann hyggðist ekki bjóða sig fram í næstu forsetakosningum. "Þó árin hafi liðið hratt er samt liðinn langur tími frá því ég ávarpaði ykkur fyrst úr þessum sal," sagði Ólafur og kvaðst hafa leitast við að sinna forsetaembættinu eftir bestu samvisku. Þær ákvarðanir sem hann hefur sem forseti þurft að taka hafa verið erfiðar, en jafnframt veitt honum mikla gleði.

Páfi fjallar um siðferðilegt uppeldi

Benedikt páfi gerði siðferðilegt uppeldi barna og heimsfrið í framtíðinni að umtalsefni í nýársprédikun sinni. "Mig langar til að minna á að það að innræta ungu fólki virðingu á sannleikanum og þekkingu á grundvallar gildum og dygðum þýðir í raun að horfa björtum augum til framtíðar," sagði hann í messunni og undirstrikaði mikilvægi þess að ungt fólk lærði "list friðsamlegrar sambúðar og gagnkvæma virðingu" en heimurinn sem það lifði í gæti kennt þeim að hegða sér á annan hátt.

Nýju ári fagnað í Lundúnum - myndir

Mikið var um dýrðir í Lundúnum í nótt. Mikill fjöldi fólks safnaðist saman við Thamesá til að fagna nýju ári og fylgjast með flugeldasýningunni.

Skíðasvæði opin í dag

Skíðafólki gefst færi á að renna sér inn í nýja árið því Bláfjöll verða opin í dag frá klukkan tólf til fjögur. Frábært veður er á svæðinu og nýtt púður yfir öllu. Þá verður einnig opið í Hlíðarfjalli á Akureyri frá tólf til fjögur. Blankalogn er sem stendur á svæðinu og troðinn þurr snjór í brekkum.

Ungur drengur brenndist á andliti

Ungur drengur var fluttur á barnadeild á Barnaspítala Hringsins í nótt vegna brunasára á andliti. Áverkana hlaut hann við flugeldasprengingar. Drengurinn er sjö ára. Enn liggja ekki fyrir upplýsingar um alvarleika meiðslanna. Ekki náðist í vakthafandi lækni vegna málsins að svo stöddu. Nýársnóttin var að öðru leyti með venjubundnu áramótasniði á slysadeild Landspítalans. Að sögn læknis voru um 70-80 manns sem trilluðu þar í gegn frá miðnætti og fram undir morgun vegna ýmis konar áverka. Það ku vera um tvöfaldur fjöldi miðað við venjulega helgi.

Tvö nýársbörn á fæðingardeild landsspítalans í nótt

Tvö börn fæddust á fæðingardeild landsspítalans í nótt. Hið fyrra kom í heiminn í Hreiðrinu nokkrum mínútum eftir miðnætti.

Kviknaði aftur í kulnaðri brennu

Eldur tók sig upp aftur í nýársbrennu um níuleytið í morgun í Suðurhlíðunum. Slökkviliðið á höfuðborgarsvæðinu var kallað út og eldurinn slökktur án nokkurra vandræða. "Það var mikill eldsmatur eftir þegar slökkt var í brennunni og einhverjar glæður leyndust í kjarnanum sem tóku sig upp aftur,“ segir starfsmaður slökkviliðsins.

Nýársnótt róleg framan af

Nýársnóttin var fremur róleg framan af hjá lögreglunni á höfuðborgarsvæðinu, en undir morgun tók við talsverður erill vegna slagsmála og ofdrykkju. Engan sakaði þó alvarlega vegna þeirra viðskipta. "Einhver uppskar kannski brotið stolt, en ekkert alvarlegra," segir lögreglumaður á vakt. Vaktmaður Lögreglunnar á Suðurnesjum sagði nóttina hafa verið rólega. "Það eru auðvitað alltaf einhverjir snúningar sem fylgja þessari nótt, hjálpa fólki heim og fleira. En það voru engin meiriháttar mál," sagði hann.

Vinsælast á Vísi árið 2011 - Erlendar fréttir

2011 var viðburðaríkt og kenndi ýmissa grasa. Hér fylgir listi yfir fimm vinsælustu fréttir ársins 2011 í flokknum erlendar fréttir á Vísi.

Áramótin úti í heimi

Nú hefur nýja árið gengið í garð í öllum löndum heims en íbúar þriggja landa fengu að njóta gamla ársins lengst allra. Allir þeir sem byggja þessa jörð hafa tekið á móti árinu 2012 með tilheyrandi hátíðahöldum. Íbúar á bandarísku-samóaeyjum, ásamt íbúum Midway-eyja og Níu, eru eflaust enn að fagna því nýja árið gekk þar í garð fyrir rúmri klukkustund.

Jarðskjálfti í Japan

Harður jarðskjálfti skók japanska jörð í morgun sem fannst víða, meðal annars í Fukushima og höfuðborginni Tókyó. Jarðskjálfti upp á sjö á richter reið yfir austur og norðausturhluta landsins klukkan hálf sjö í morgun. Hann átti upptök sín á um þrjúhundruð og fimmtíu kílómetra dýpi við eyjuna Torishima sem er í tæplega sexhundruð kílómetra fjarlægð frá Tókýó. Engar fregnir hafa borist af manntjóni og flóðbylgjuviðvörun hefur ekki verið gefin út.

Nýársnótt hjá lögreglu

Líkamsárás, lausaganga hrossa og ölvunarakstur var á meðal þess sem kom inn á borð lögreglu þessa fyrstu nótt ársins. Maður um tvítugt var fluttur á sjúkrahús eftir líkamsárás sem átti sér stað á Gíslagötu við Ráðhúsið á Akureyri um fimmleytið í nótt. Karlmaður veitti unga manninum kjaftshögg með þeim afleiðingum að hann kjálkabrotnaði og þarf að gangast undir aðgerð. Árásarmaðurinn er ekki í haldi lögreglu þar sem hann var farinn af vettvangi þegar hana bar að. Hann er þó þekktur og verður yfirheyrður þegar til hans næst.

Gleðilegt nýtt ár!

Starfsfólk Fréttastofu Stöðvar 2 og Vísis óskar lesendum og landsmönnum öllum gleðilegs nýs árs og þakkar samfylgdina á því ári sem nú er liðið.

Skoðun Steingríms á forsetanum: „Ég hef hana fyrir mig“

Forsvarsmenn stjórnmálaflokkanna við háborðið í Kryddsíldinni tóku því misvel þegar tilkynnt var um útnefningu á manni ársins 2011 sem í þetta sinn er Ólafur Ragnar Grímsson forseti Íslands.

Ólafur Ragnar útnefndur maður ársins í Kryddsíldinni

Maður ársins að mati Fréttastofu Stöðvar 2 og Vísis er Ólafur Ragnar Grímsson forseti Íslands. Skemmst er frá því að segja að fáir hafa komið jafn afgerandi við sögu í fréttum á árinu og hann - ekki einungis á innlendum vettvangi heldur líka erlendum.

Stýrir landbúnaðar- og sjávarútvegsráðuneytinu í annað sinn

Steingrímur J. Sigfússon tók við tveimur ráðuneytum á ríkisráðsfundi í morgun, landbúnaðar- og sjávarútvegsráðuneytinu og efnahags- og viðskiptaráðuneytinu. Þetta er í annað sinn sem Steingrímur fer með embætti landbúnaðarráð- og sjávarútvegsráðherra, en hann gegndi embættinu í minnihlutastjórninni sem skipuð var í febrúar 2009.

Margrét vill kosningar á sama tíma og landsdómsmálið verður í hámæli

Margrét Tryggvadóttir sagði að sér lítist vel á þá hugmynd að blása til kosninga strax í vor. Hún sagði það hljóma vel í eyrum þeirra sem vilji halda Sjálfstæðisflokknum sem lengst frá völdum í því ljósi að þá Landsdómsmálið, ákæran gegn Geir Haarde fyrrverandi formanni flokksins, væntanlega í hámæli. Því væri það góður tími til að kjósa til þings.

Vinsælast á Vísi árið 2011 - Umræðan

Á hverjum einasta degi ársins birtust nýjar greinar í Umræðunni á Vísi. Hvort sem það voru fastir pennar Fréttablaðsins og Vísis, aðsendar greinar eða greinaflokkar á borð við Öðlinginn; flest helstu mál samtímans voru krufin til mergjar á þessum vinsæla og lifandi vettvangi.

Sautján brennur á höfuðborgarsvæðinu

Áramótabrennur verða venju samkvæmt haldnar víða um land á gamlárskvöld. Eldvarnareftirlit Slökkviliðsins á höfuðborgarsvæðinu hefur veitt leyfi fyrir sautján brennum á starfssvæði sínu og þá verða brennur í flestum öðrum bæjarfélögum.

Skemmtiannáll 2011

Meðfram hefðbundnum fréttaflutningi leggur Fréttastofa Stöðvar 2 töluvert upp úr því að fá áhorfendur til að brosa. Á gamla árinu gafst blessunarlega oft tilefni til þess. Við vorum til dæmis minnt á hver ætti íslenska smjörið og hver gegndi embætti sjávarútvegs- og landbúnaðarráðherra. Hér eru nokkur skemmtileg augnablik úr fréttatímum Stöðvar 2.

Steingrímur í Kryddsíld: Eftirsjá að Jóni og Árna

Steingrímur J. Sigfússon formaður VG fullyrti í Kryddsíld Stöðvar 2 sem nú stendur yfir að nýskipuð ríkisstjórn njóti meirihlutastuðnings á Alþingi, engar vísbendingar hafi komið fram um annað. Jón Bjarnason var þó ekki tilbúinn til þess að svara því í gærkvöldi hvort hann styðji ríkisstjórnina þegar fréttamenn gengu á hann en Steingrímur segir að menn verði að hafa skilning á því þegar fjölmiðlar hafi herjað á Jón "á erfiðu kvöldi“. Hrókeringarnar í gær hafi verið erfiðar og að þær hafi tekið innan beggja meirihlutaflokkanna. "Við erum meirihlutastjórn,“ sagði Steingrímur.

Kryddsíld Stöðvar 2 í beinni útsendingu

Hin árlega Kryddsíld Stöðvar 2 hefst klukkan 14 og verður í beinni útsendingu á Stöð 2 og hér á Vísi. Í Kryddsíldinni fara stjórnmálaleiðtogar landsins yfir árið sem er að líða og ræða það sem hæst bar auk þess sem rætt verður um árið sem senn rennur upp.

Draumur um einsemd

Gamlir og nýir andstæðingar EES halda því fram að það sem vont og skaðlegt var fyrir hrun hafi komið með EES-samningnum segir Pawel Bartoszek og bendir á að það yrði galin ákvörðun að segja samningnum upp. Enginn hafi grætt meira á EES en Íslendingar og enginn muni tapa meira á uppsögn samningsins en íslenska þjóðin.

Ríkisstjórnin nær fallin í gær - Kristrún gagnrýnir forystuna harðlega

"Ráðherrakapall Jóhönnu (og Dags og Hrannars) var svo ruglingslegur, ráðalaus, óviss og órökstudd ferð án fyrirheits að enginn var hrifinn og hann í raun féll í umræðu á sögulegum flokkstjórnarfundi Sf í gær.“ Svo ritar á Facebook síðu sína Kristrún Heimisdóttir, fyrrverandi aðstoðarmaður Árna Páls Árnasonar, sem hvarf úr stóli efnahags- og viðskiptaráðherra í dag.

Mugison Maður ársins á Bylgjunni

Örn Elías Guðmundsson, betur þekktur sem Mugison, var valinn maður ársins hjá hlustendum Bylgjunnar nú í morgun. Tilkynnt var um valið í þættinum "Reykjavík árdegis“ en um stjórnartauma þar héldu þeir Kristófer Helgason, Þorgeir Ástvaldsson og Bragi Guðmundsson. Þeir eru vanari að vera í loftinu síðdegis en í dag, gamlársdag, varð breyting á.

Kalkúnn á innan við klukkutíma

Djúpsteiktur kalkúnn hefur lengi verið vinsæll í Suðurríkjum Bandaríkjanna. Eldunaraðferðin hefur nú breiðst út um heiminn, alla leið til Íslands. Sólveig Gísladóttir spjallaði við Júlíus Jónsson , matreiðslumann á Akureyri, sem djúpsteikir kalkún fyrir fjölskylduboðið á gamlársdag og segir stuttan eldunartíma einn helsta kostinn við þessa aðferð.

Ný ríkisstjórn Íslands

Ný ríkisstjórn er tekin til starfa á Íslandi. Oddný G. Harðardóttir hefur tekið við embætti fjármálaráðherra og þeir Árni Páll Árnason og Jón Bjarnason hverfa frá ríkisstjórnarborðinu. Þetta var innsiglað á Ríkisráðsfundi á Bessastöðum nú fyrir hádegið.

Strætóferðir til Hafnar hafnar

Þjónustusvæði Strætó bs. stækkar til muna á Suðurlandi um áramót og leiðum fjölgað. Samtengt leiðakerfi allt frá Höfn í Hornafirði til Reykjavíkur.

Sex hundruð tonn af flugeldum sprengd

Áætlað er að um 600 tonnum af flugeldum verði skotið á loft í dag og kvöld. Þyngdin jafngildir um 200 Land Cruiser jeppum. Neytendastofa bendir á að framleiðendur og dreifingaraðilar flugelda beri skaðabótaábyrgð samkvæmt íslenskum lögum um skaðsemisábyrgð ef varan er gölluð.

Lyklakippa Steingríms þyngist í dag

Steingrímur J. Sigfússon formaður VG verður í aðalhlutverki í dag þegar lyklaskipti fara fram í ráðuneytunum eftir ráðherrakapalinn sem lagður er formlega á Ríkisráðsfundi nú fyrir hádegið. Venju samkvæmt afhenda fráfarandi ráðherrar nýjum ráðherrum lykla sína að ráðuneytunum en í þetta sinn er ekki hægt að gera það á sama tíma allstaðar, þar sem Steingrímur kemur að öllum lyklaskiptunum.

Íranir vilja ræða málin

Íranir ætla að óska eftir fundi með Bandaríkjamönnum, Rússum, Kínverjum, Bretum, Frökkum og Þjóðverjum til að ræða kjarnorkuáætlanir landsins, þetta hefur íranski sendiherrann í Þýskalandi tilkynnt um. Helsti samningamaður Írana um kjarnorkumál mun senda utanríkismálastjóra Evrópusambandsins bréf innan skamms og biðja hann um að undirbúa viðræðurnar.

Enn einn skjálftinn í Christchurch

Jarðskjálfti upp á fimm komma þrjá á Richter reið yfir nýsjálensku borgina Christchurch í nótt en hann átti upptök sín fjórtán kílómetra norðaustur af borginni. Engar fregnir hafa borist af manntjóni og þarlend yfirvöld hafa ekki gefið út viðvaranir.

Opið á skíðasvæðunum fyrir norðan

Skíðamenn sem staddir eru norðanlands geta kvatt árið sem er að líða með því að taka nokkrar salíbunur. Hlíðarfjall á Akureyri er opið frá klukkan tíu til þrjú í dag. Þar eru tæpir tíu metrar á sekúndu og hiti rétt yfir frostmarki. Á Siglufirði verður opið í dag gamlársdag frá kl 11-14, veðrið og færið er frábært að sögn starfsmanna. Á Siglufirði hefur svæðið verið opið í sautján daga í desember á þessu ári og hafa gestir verið um eitt þúsund.

Ríkisráðsfundur að hefjast

Þingflokkur Vinstri grænna afgreiddi tillögu um breytingar á ríkisstjórn Íslands í gær með níu atkvæðum af tólf, en þrír sátu hjá. Breytingarnar fela í sér að Jón Bjarnason sjávarútvegsráðherra og Árni Páll Árnason hverfi úr ríkisstjórn og Steingrímur J. Sigfússon taki við sameinuðu ráðuneyti, en Oddný Harðardóttir verði fjármálaráðherra. Jón Bjarnason lét hafa eftir sér að fundinum loknum að hann væri ósáttur við breytingarnar og hann teldi þær gerðar til að greiða fyrir aðildarumsókn við Evrópusambandið. Hann svaraði því ekki afdráttarlaust hvort hann styddi ríkisstjórnina.