Kalkúnn á innan við klukkutíma

31. desember 2011 11:43

Djúpsteiktur kalkúnn hefur lengi verið vinsæll í Suðurríkjum Bandaríkjanna. Eldunaraðferðin hefur nú breiðst út um heiminn, alla leið til Íslands. Sólveig Gísladóttir spjallaði við Júlíus Jónsson , matreiðslumann á Akureyri, sem djúpsteikir kalkún fyrir fjölskylduboðið á gamlársdag og segir stuttan eldunartíma einn helsta kostinn við þessa aðferð.

Hugmyndina að djúpsteiktum kalkúni fékk ég í gegnum kunningja minn sem hafði lesið um þessa aðferð í matreiðslubók," segir Júlíus Jónsson matreiðslumaður sem hefur síðastliðin sex ár djúpsteikt kalkún um áramótin.

„Ég pantaði mér sérstakan pott frá Bandaríkjunum. Hann lítur út eins og venjulegur pottur, bara breiðari og hærri, en honum fylgja ýmsir aukahlutir," segir hann og nefnir sem dæmi handfang sem er eins og öfugt járnherðatré til að láta kalkúninn síga ofan í olíuna, hitamælir til að fylgjast með olíunni og stór sprauta með grófri nál sem er notuð til að sprauta kryddblöndu í vöðvann á kalkúninum. „Svo eru merkingar innan á pottinum sem segja til um hve mikla olíu þarf að nota miðað við þyngd fuglsins," útskýrir Júlíus en nokkra lítra af olíu þarf í eldamennskunni.

Stuttur eldunartími er eitt helsta aðdráttaraflið við djúpsteikinguna en aðeins þarf að elda kalkúninn í 6, 7 mínútur á hvert kíló. Þannig tekur um þrjú korter að elda stóran kalkún.

„Áður byrjaði maður að setja kalkúninn í ofninn rétt fyrir klukkan ellefu og svo var maður allan daginn að ausa smjörið eða setja smjör undir haminn eða vera með alls konar æfingar til að halda kjötinu safaríku. Það tókst ekki nógu vel og því var um að gera að prófa nýja aðferð," segir Júlíus og er afar ánægður með útkomuna úr djúpsteikingunni.

Hann er beðinn um að lýsa aðferðinni: "Kalkúnninn þarf að vera þíður og maður þarf að þurrka hann vel. Svo kryddar maður hann með kryddi að eigin vali," segir Júlíus og tekur fram að djúpsteikingin fari alltaf fram utandyra. Enda fylgir pottinum öflugt hitaelement sem fest er við gaskút.

„Olían er hituð í 180 gráður. Svo lætur maður kalkúninn síga varlega ofan í pottinn, hefur hitamælinn í pottinum og setur lokið á. Síðan getur maður bara farið inn og hugað að sósunni og brúnuðu kartöflunum," segir Júlíus glaðlega.

Hann segir litla hættu stafa af ef varlega er farið. "Auðvitað er alltaf hætta af heitri olíu ef farið er óvarlega og olían freyðir yfir, en það hefur aldrei gerst hjá mér."

Júlíus segir bragðið af kalkúninum afar gott. "Eftir 45 mínútur er kalkúnninn orðinn gullinnbrúnn, ég læt olíuna leka af og set hann svo í ofnskúffu og inn í ofn í smá stund meðan ég klára undirbúninginn. Þegar maður síðan sker í vöðvana er það eins og skera í mjúkt smjörstykki, hann er svo safaríkur."

Gæði kalkúnsins hans Júlíusar hefur spurst út og segir hann flesta sína vini eiga djúpsteikingarpott. „Á gamlárskvöld erum við með tvo potta enda er eldað fyrir fimmtán, sextán manns. Síðan hefur komið fyrir að við höfum steikt aukakalkún fyrir nágrannana enda tekur svo stuttan tíma að elda kalkúninn," segir hann og hlær.

Júlíus hefur notað pottinn í fleira en kalkúnasteikingu. „Hann er fínn til að grilla kjúklingaleggi og franskar kartöflur. Svo er á stefnuskránni að prófa að elda gæs í þessu. Það verður spennandi."

Mest lesið

Fleiri fréttir