Ríkisstjórnin nær fallin í gær - Kristrún gagnrýnir forystuna harðlega

„Ráðherrakapall Jóhönnu (og Dags og Hrannars) var svo ruglingslegur, ráðalaus, óviss og órökstudd ferð án fyrirheits að enginn var hrifinn og hann í raun féll í umræðu á sögulegum flokkstjórnarfundi Sf í gær." Svo ritar á Facebook síðu sína Kristrún Heimisdóttir, fyrrverandi aðstoðarmaður Árna Páls Árnasonar, sem hvarf úr stóli efnahags- og viðskiptaráðherra í dag.

Hún segist hafa verið á öllum flokkstjórnarfundum Samfylkingarinnar frá upphafi. „Aldrei áður hefur neitt þessu líkt gerst. Klukkan hálfníu var svo komið að forysta og ríkisstjórn væru að falla á fundinum líka og fór um marga föla fyrirliða. Það þurfti ræðu Árna Páls til bjargar og höfðu þó allar hvellandi básúnur Össurar og annarra sjálfskipaðra yfirkonfrensráða glumið yfir salinn og hótunum verið beitt á jafnt á ungliða sem eldri borgara," segir Kristrún.

Kristrún bendir á að tillaga um aukalandsfund í vor hafi hlotið afgreiðsluhlaut afgreiðslu. „Ný forysta verður væntanlega kosin í vor. Þá kemur flokksstjórn aftur saman í janúar til að krefjast stefnu og stjórnfestu í stað fyrirhugaðs mánaða flöskustúts á Arnarhóli um á hvaða ráðherrum í hlutastörfum og hvernig ýmis helstu þjóðarhagsmunamál lendi s.s. efnahags- atvinnu-, auðlinda- og nýsköpunarmál. Á fundinum í gær var því miður ekki staðfest hver yrði fjármálaráðherra landsins eftir sex mánuði. AGS, ESB, lánshæfismatsfyrirtækin og norrænu lánveitendur ríkissjóðs verða „hrifnir"," segir hún að lokum.