Eyjagos: Fyrsta húsið komið í ljós

Fyrsta húsið í Brekkunni í austurbæ Vestmannaeyja sem fór undir gjósku í gosinu 1973 kom í ljós í dag. Uppgröftur húsanna hófst fyrir viku.

Fengu leyfi fyrir tjaldbúðunum

Skipuleggjendur mótmælabúða við Kárahnjúka hafa nú fengið leyfi heilbrigðiseftirlits Austurlands fyrir tjaldbúðunum að sögn Ólafs Páls Sigurðssonar, helsta hvatamanns aðgerðanna. Þá segist hann búast við að fá leyfi landeigenda í kvöld eða fyrrramálið en landið tilheyrir prestsjörðinni Valþjófsstað.

Pyntingar á Austurvelli í dag

Íslandsdeild Amnesty International bauð gestum og gangandi upp á pyntingar á Austurvelli í dag. Þar var verið að líkja eftir pyntingum sem fangar í Guantanamo-fangelsinu á Kúbu verða fyrir af hálfu bandarískra hermanna.

Settu sig í spor pyntaðra fanga

Íslandsdeild Amnesty International mótmælti pyndingum á Austurvelli í gær. Vegfarandur gátu fengið að reyna á eigin skinni þá meðferð sem fangar í Guantanamo fá.

Fuglaflensa í Japan

Meira en 800 hænsn hafa drepist úr fuglaflensu í Japan síðan í apríl. Flensan kom einnig upp í landinu í fyrra en þá drápust meira en 300 þúsund fuglar. Smit fannst í manni í Japan í fyrra en enginn hefur látist þar.

Óbreytt kjarnorkuáætlun

Mahmoud Ahmadinejad, nýkjörinn forseti Írans, lýsti því yfir á blaðamannafundi í gær að hann hygðist beita sér fyrir því að kjarnorkuáætlun landsins yrði haldið áfram.

Á fjórða tug fórust í Mosul

Ekkert lát er á óöldinni í Írak. Í gær fórst á fjórða tug manna í sprengjuárásum í Bagdad og Mosul. Fyrst var pallbíl hlöðnum sprengiefni ekið inn í lögreglustöð í miðborg Mosul og létust 10 lögreglumenn í sprengingunni. Sprengiefnið var falið í vatnsmelónum sem hlaðið var á pall bílsins.

Ahmadinejad kjörinn forseti Írans

Harðlínumenn báru sigur úr býtum í annarri umferð forsetakosninga í Íran í gær. Mahmoud Ahmadinejad, sem er borgarstjóri í Teheran og mjög íhaldssamur, vann stórsigur á mótframbjóðanda sínum. Ahmadinejad virðist einkum hafa hlotið stuðning fátækari og trúaðri kjósenda en framsæknari, frjálslyndari og auðugri borgarar studdu Akbar Rafsanjani sem boðaði umbætur.

Maður sem leitað var að fundinn

Maðurinn sem lýst var eftir á Austurlandi í gær er kominn fram. Samkvæmt upplýsingum lögreglunnar á Eskifirði fór hann ranga leið á leið frá Djúpavogi til Egilsstaða í fyrradag og lenti á torfærum vegslóða og festi bíl sinn.

Pítsusendill rændur í austurborg

Pítsusendill var rændur í austurborg Reykjavíkur um sexleytið í morgun. Maður ógnaði sendlinum með hnífi og rændi af honum farsíma og tösku með lítilræði af peningum. Málið er í rannsókn og er ræningjans leitað. Þá voru sex ökumenn stöðvaðir í miðborginni grunaðir um ölvun við akstur og einn aðili var tekinn með lítilræði af amfetamíni á sér á Laugaveginum í nótt.

Handteknir eftir slagsmál

Tveir menn voru vistaðir í fangaklefum lögreglunnar í Keflavík eftir átök við lögreglumenn utan við skemmtistað í bænum í nótt. Í Hafnarfirði voru þrír ökumenn teknir grunaðir um ölvun við akstur en að öðru leyti var nóttin róleg hjá lögreglunni þar í bæ. Sömu sögu er að segja frá Akureyri þar sem nóttin var róleg. Þó var einn ökumaður stöðvaður grunaður um ölvun við akstur.

Stór hluti fjárframlaga til ríkra

Stór hluti fjárframlaga og hjálparinnar til handa fórnarlömbum flóðbylgjunnar í Asíu fór til þeirra sem auðugastir eru samkvæmt nýrri skýrslu sem bresku góðgarðarsamtökin Oxfam hafa tekið saman. Fátækir, sem þurftu einna helst á hjálp að halda fengu einna minnst á meðan mest lenti í vasa stóreignafólks, bæði kaupsýslumanna og landeigenda.

Kuldakasti lokið fyrir norðan

Langvarandi kuldakasti á Norður- og Austurlandi virðist vera lokið. Nú er komin sunnanátt með rigningu sunnan heiða en hlýindum og þurrviðri norðanladns og austan. Klukkan níu í morgun var hitinn kominn í þrettán stig á Akureyri, fjórtán á Hallormsstað en hlýjast var á Miðfjarðarnesi við Bakkaflóa, fimmtán gráður.

Kúariða komin upp í Bandaríkjunum

Kúariða er komin upp í Bandaríkjunum en vísindamenn hafa nú staðfest að annað tilfellið hafi fundist. Fyrsta, sýkta dýrið fannst fyrir sjö mánuðum. Bæði dýrin eru albandarísk og því talið öruggt að ekki sé um innfluttan stofn veikinnar að ræða. Þrátt fyrir þessi tíðindi fullyrða talsmenn bandarísks landbúnaðar að nautakjöt þar í landi sé með öllu hættulaust enda sé þess gætt að kjöt sýktra dýra lendi ekki á markaði.

Gróðursett í tilefni afmælis SÍ

75 trjáplöntur verða gróðursettar nú fyrir hádegi í Vinaskógi í Þingvallasveit í tilefni 75 ára afmælis Skógræktarfélag Íslands. Athöfnin hófst klukkan 10.15 og lýkur laust fyrir klukkan tólf. Þangað er boðið ýmsum ráðamönnum þjóðarinnar er tengjast félaginu, aðilum er starfað hafa í skógræktarfélögunum eða veitt skógræktarfélögunum liðveislu á einn eða annan hátt.

Harðlínumenn hafa öll valdaembætti

Harðlínumenn unnu óvænt stórsigur í annarri umferð forsetakosninga í Íran í gær. Þeir hafa nú öll valdaembætti í landinu í höndum sér.

Olíutunnan gæti náð 100 dollurum

Olíuverð gæti náð hundrað dollurum á tunnuna haldi þróunin áfram eins og nú. Þetta er mat þýskra sérfræðinga.

Kannar vísbendingar eftir rán

Pítsusendill var rændur í austurborg Reykjavíkur um sexleytið í morgun. Hann hafði verið pantaður að fjölbýlishúsi við Hvassaleiti. Í anddyri þess réðst maður vopnaður hnífi að sendlinum og rændi af honum farsíma og tösku með lítilræði af peningum. Ræningjans er leitað en lögreglan telur sig hafa ákveðnar vísbendingar sem verið er að kanna.

Aldrei fleiri brautskráðir frá HÍ

Fjölmennasta brautskráning í sögu Háskóla Íslands fer fram í Egilshöll í dag og hefst hún klukkan eitt. Þetta er jafnframt 24. og síðasta brautskráning í rektorstíð Páls Skúlasonar. 801 kandídat verður útskrifaður og en sá elsti verður áttræður í haust. Það er Magnús Sigurðsson sem útskrifast með B.A.-próf í íslensku. Þá má geta þess að fyrstu nemendur ljúka nú meistaranámi í fötlunarfræðum og í upplýsinga- og bókasafnsfræðum.

Geti ráðist á hryðjuverkamenn ytra

Rússar eru reiðubúnir að ráðast á bækisstöðvar hryðjuverkamanna erlendis. Þetta sagði yfirmaður rússneska flughersins í morgun. Hann segir flugherinn búa yfir hátæknivopnum og getu til þess að ráðast á hryðjuverkamenn hvar sem er.

Uppbygging húsa óvíða hafin

Fátækir fá minnsta aðstoð í kjölfar náttúruhamfaranna í Asíu. Ríkir hafa fengið stærsta hluta aðstoðarinnar. Þá bendir bresk rannsókn til þess að á fáum stöðum sé byrjað að byggja hús fyrir þá sem misstu sín.

Sprengja við teina í Dagestan

Tveir menn á viðhaldslest slösuðust þegar sprengja sprakk við lestarteina í héraðinu Dagestan í Rússlandi skömmu eftir miðnætti. Fréttastofan <em>Interfax</em> hefur eftir lögregluyfirvöldum á svæðinu að um heimatilbúna sprengju hafi verið að ræða en enginn hefur lýst yfir ábyrgð á tilræðinu.

Flóðin í Kína í rénun

Svo virðist sem flóðin í suðurhluta Kína, sem valdið hafa miklum usla undanfarnar vikur, séu í hægri rénun. Alls hafa 567 látist í flóðunum og þá er enn 165 saknað. Flóðin má rekja til árlegra rigninga sem valda því að ár flæða yfir bakka sína en einnig hafa aurskriður fallið á þorp og bæi

Leitað að dularfullu kattardýri

Mikil leit stendur yfir í Hollandi af dularfullu kattardýri sem sést hefur nokkrum sinnum í austurhluta landsins. Ekki er vitað hverrar tegundar dýrið er þrátt fyrir að myndir hafi náðst af því, en talið er líklegt að um stórt frumskógarkattardýr sé að ræða.

Handtóku grunaða uppreisnarmenn

Ísraelskir hermenn handtóku í morgun 14 félaga í palestínsku samtökunum Heilögu stríði á Vesturbakkanum. Handtakan kemur í kjölfar þess að byssumenn drápu íraelskan landnema í gær en þess ber að geta að engin samtök höfðu lýst tilræðinu á hendur sér.

Harðlínumenn með tögl og hagldir

Mahmoud Ahamadinejad er nýr forseti Írans en þar með fara harðlínumenn með flest völd í landinu. Búast má við hann verði erfiður viðureignar í samskiptum sínum við Vesturlönd.

Drukku ólöglegt brugg og létust

Að minnsta kosti 21 Keníamaður er látinn eftir að hafa drukkið ólöglegt brugg í þorpi skammt frá Naíróbí, höfuðborg Kenía, í gær. Þá liggja 36 á spítala vegna drykkjunnar og eru átta þeirra í lífshættu en tíu til viðbótar hafa misst sjónina af völdum drykksins. Fólkið mun hafa fengið bruggið á krá í þorpinu og veiktist í kjölfarið heiftarlega.

Samkvæmistjald við Kárahnjúka

Samkvæmistjald hefur nú verið sett upp í tjaldbúðum mótmælenda við Kárahnjúka. Þar eru auk þess komin upp þrjú svefntjöld. Allt hefur verið með friði og spekt og hafa tjaldbúar engar tilraunir gert til að fara inn á vinnusvæðið eða trufla verktaka, samkvæmt upplýsingum frá eftirlitsaðila með framkvæmdunum. Á heimasíðu mótmælenda voru síðustu fréttir þær að tólf manns væru í tjaldbúðunum.

Réðust á flóttamannabúðir í Úganda

Rúmlega 100 uppreisnarmenn fóru í dag ránshendi um flóttamannabúðir í norðurhluta Úganda ásamt því að ráðast gegn íbúum búðanna. Ekki er ljóst hvort einhverjir létust eða særðust í árásinni en uppreisnarmennirnir létu greipar sópa í matargeymslum búðanna.

Felldu tæplega 180 talibana

178 talibanar voru felldir og 56 handteknir í átökum í suðurhluta Afganistans sem staðið hafa síðustu þrjá daga. Frá þessu greindi varnarmálaráðuneyti landsins í dag. Um var að ræða samhæfðar aðgerðir afganska hersins og þess bandaríska og létust flestir talibananna í loftárásum Bandaríkjahers. Hins vegar sluppu tveir háttsettir talibanar úr klóm hersveitanna eftir að sveitirnar höfðu umkringt þá, að sögn talsmanns varnarmálaráðuneytisins.

Kosið um skipulagsmál á Nesinu

Seltirningar kjósa í dag um skipulagsmál á Hrólfskálamel og Suðurströnd. Valið stendur á milli tveggja tillagna sem nefndar eru tillögur H og S. Samkvæmt tillögu H er gert ráð fyrir gervigrasvelli og blandaðri byggð á Hrólfskálamel, þar sem fyrirtæki er nú, en íbúðabyggð á Suðurströnd fyrir neðan Valhúsaskóla fyrir um 350 íbúa. Í tillögu S er þessu öfugt farið, þ.e. gert er ráð fyrir að gervigrasvelli fyrir neðan Valhúsaskóla en byggð á Hrólfskálamel fyrir um 240 íbúa.

Ellefu drepnir í Samarra í dag

Að minnsta kosti ellefu manns létust og 20 særðust í tveimur árásum í bænum Samarra norður af Bagdad í Írak í dag. Í fyrra skiptið var um að ræða sjálfsmorðsárás þar sem maður sprengdi sig og bíl sinn í loft upp fyrir utan heimili yfirmanns í sérsveit Írakshers. Níu létust í tilræðinu. Stuttu eftir árásina sprakk sprengja við veg í bænum og þar létust tveir auk þess fjögur hús eyðilögðust.

Þingkosningar í Búlgaríu

Búlgarar ganga til þingkosninga í dag. Talið er að sósíalistar, sem eru í stjórnarandstöðu, beri sigurorð af flokki Simeons, fyrrverandi konungs landsins, sem haldið hefur um stjórnartaumana síðustu ár. Kosningarnar snúast að miklu leyti um ýmiss konar umbætur í landinu en þær eru skilyrði fyrir aðildarviðræðum við Evrópusambandið.

Skorti skilning á fjármálum HÍ

Páll Skúlason, fráfarandi rektor Háskóla Íslands, sakaði fjármálaráðuneytið um skilningsskort á fjármálum Háskóla Íslands í síðustu brautskráningarræðu sinni í Egilshöll í dag. Páll sagði viðbrögð embættismanna ráðuneytisins við nýlegri skýrslu Ríkisendurskoðunar um háskólann benda til þess að þeir skildu ekki hvernig standa þyrfti að uppbygginu öflugs rannsóknarháskóla.

Dæmdur fyrir aðild að hryðjuverkum

Einn af helstu leiðtogum íslamskra uppreisnarmanna í Alsír var í dag dæmdur í lífstíðarfangelsi fyrir aðild sína að stofnun hryðjuverkahóps. Amari Saifi var næstæðstur í samtökunum GSPC en þau rændu m.a. 32 evrópskum ferðamönnum í eyðimörkinni í Alsír árið 2003 og eru forsvarsmenn þeirra m.a. eftirlýstir í Þýskalandi af þeim sökum. Við réttarhöldin voru tveir samverkamenn Saifis dæmdir í þriggja ára fangelsi en þrír voru sýknaðir.

Leitað vegna meintrar nauðgunar

Karlmanns um fimmtugt er nú leitað eftir að kona um þrítugt kom á lögreglustöð í dag og kærði hann fyrir nauðgun. Atburðurinn á að hafa gerst í heimahúsi nálægt miðborg Reykjavíkur milli klukkan eitt og tvö í nótt en karlmaðurinn og konan þekktust.

Óvænt kosningaúrslit í Íran

Harðlínumenn ráða nú öllu í Íran eftir að hinn íhaldssami frambjóðandi, Ahmadinejad, vann óvæntan en afgerandi sigur í forsetakosningum. Þegar hann var skipaður borgarstjóri í Teheran 2003 var hann nánast óþekktur og í upphafi kosningabaráttunnar nú hafði það lítið breyst.

Vísar fullyrðingunum á bug

Forstjóri Útlendingastofnunar vísar algerlega á bug fullyrðingum átta hælisleitenda sem saka íslensk stjórnvöld um seinagang í þeirra málum. Hún segir vinnslu mála af þessu tagi oft flókna og taka langan tíma þar sem rangar upplýsingar séu oft gefnar.

Ólafur Ragnar í Utah

Ólafur Ragnar Grímsson forseti Íslands er nú í opinberri heimsókn í Utah-fylki í Bandaríkjunum. Í gær var hann við athöfn í bænum Spanish Fork til heiðurs 16 Íslendingum sem settust þar að fyrir um 150 árum síðan. Í bænum er minnismerki sem ber nöfn landnámsmannana og 410 afkomenda þeirra.

Segir lögreglu hafa beitt harðræði

Lögreglan í Reykjavík handtók í fyrrinótt þrjá pilta á aldrinum fimmtán til sextán ára við verslun Select í Breiðholti grunaða um að hafa unnið skemmdarverk á húsum í nágrenninu. Samkvæmt upplýsingum lögreglu voru piltarnir ölvaðir og einn þeirra með hamar innanklæða.

Hálft ár liðið frá flóðbylgju

"Það er ekki mikil uppbygging komin af stað en okkur sýnist sem þetta geti farið að gerast núna," segir Ómar Valdimarsson, starfsmaður Rauða krossins í Indónesíu. Í dag er hálft ár liðið síðan flóðbylgja reið yfir Bengalflóa á annan dag jóla.

4000 manns á Kirkjudögum

Skólavörðuholtið iðaði af lífi í dag í tengslum við Kirkjudaga sem Þjóðkirkjan stendur fyrir. Talið er að um fjögur þúsund manns hafi tekið þátt í dagskránni í dag. Boðið var upp á málstofur, listsýningar og götuleikhús svo fátt eitt sé nefnt.

Minni velta á húsnæðismarkaði

Velta á húsnæðismarkaði á höfuðborgarsvæðinu í síðustu viku var rétt rúmlega 2,5 milljarðar og hefur ekki verið minni frá því í ágúst á síðasta ári. Meðalupphæð á hvern kaupsamning var 19,7 milljónir króna. Veltan dróst saman um meira en helming frá vikunni á undan en þá velti húsnæðismarkaður höfuðborgarsvæðisins um 5,6 milljörðum. Þetta kemur fram á vefsíðu Fasteignamats ríkisins.

Fórnarlamba flóðsins enn leitað

Börn eru meðal helstu fórnarlamba náttúruhamfaranna í Asíu um jólin. Nú, þegar hálft ár er liðið, er ættingja þeirra og fleiri enn leitað. Alþjóðlegar sveitir leita líka þess fólks, m.a. hópur Breta sem minntust landa sinna í dag

Kínverskar konur á völturunum

Kínversku valtarakonurnar hafa vakið óskipta athygli á Kárahnjúkum, enda eru konur innan við tíundi hluti starfsmanna. Einn æðsti stjórnandi á svæðinu er þó kona; verkfræðingur sem jafnframt er verðlaunaður barnabókahöfundur.