Minni velta á húsnæðismarkaði

Velta á húsnæðismarkaði á höfuðborgarsvæðinu í síðustu viku var rétt rúmlega 2,5 milljarðar og hefur ekki verið minni frá því í ágúst á síðasta ári. Meðalupphæð á hvern kaupsamning var 19,7 milljónir króna. Veltan dróst saman um meira en helming frá vikunni á undan en þá velti húsnæðismarkaður höfuðborgarsvæðisins um 5,6 milljörðum. Þetta kemur fram á vefsíðu Fasteignamats ríkisins. Ingólfur G. Gissurarson fasteignasali segir að síðustu tvo, þrjá mánuði hafi orðið vart við mun minni eftirspurn á markaði og nú sé svo komið að framboðið sé mun meira en eftirspurnin. Enn sé verð þó allhátt enda horfi þeir sem eru að selja til þess hversu hátt verðið hefur verið undanfarið. Hann segir að það ríki líka ákveðin hræðsla á markaðnum vegna fréttaflutnings af því að raunverðgildi fasteigna lækki umtalsvert ef verðbólga heldur áfram að vaxa. Aðspurður hvort verðbólan sé að hjaðna eða jafnvel springa segir Ingólfur ekki halda að svo sé. Hann telur hinsvegar að verðið muni ekki hækka meira en orðið er. Guðmundur Ólafsson hagfræðingur segist heldur ekki búast við því að verðið lækki að neinu ráði. Hann segir líklega ástæðu fyrir skyndilega minni eftirspurn á húsnæðismarkaði vera að bæði þeir sem hafi nýtt nýja lánamöguleika til að hagræða sínum húsnæðislánum séu búnir að því sem og þeir sem lögðu í að kaupa sína fyrstu íbúð vegna hagstæðari lána. Hann hefur ekki áhyggjur af því að allt fari á versta veg svo lengi sem hagvöxtur helst nokkuð stöðugur í landinu. Guðmundur segist þekka til fasteignasala sem kvarta undan því núna að eignir hreyfist lítið miðað við það sem áður var. Hann býst því við því að mestu lætin séu búin á húsnæðismarkaðinum í bili.