„Ein­stakur“ Ísak gerði A fyrir unnustuna

Óhætt er að segja að hinn 23 ára gamli Ísak byrji nýtt tímabil með Köln af krafti. Hann var nokkuð aftarlega á miðjunni í fyrri hálfleik gegn Würzburger en þegar liðið var 1-0 undir í hálfleik fékk hann að fara framar og þakkaði fyrir sig með tveimur mörkum.

Það seinna, sigurmarkið, var skot í stöng og inn eins og sjá má hér að neðan eða í hápunktum leiksins með því að smella hér.

Mörkunum fagnaði Ísak með því að mynda A með fingrunum, fyrir unnustu sína Agnesi Perlu Sigurðardóttur sem hann trúlofaðist í sumar.

„Það var klárlega svolítil heppni í fyrra markinu en seinna markið skoraði hann með snilldarhætti,“ sagði René Wagner, þjálfari Kölnar, ánægður með Ísak eftir leik.

„Ég er ánægður með að hann sé að fóta sig betur í hlutverkinu fram og aftur á miðjunni. Hann býr yfir einstaklega breiðu bili hæfileika,“ sagði Wagner.

Fyrsti deildarleikur Kölnar á nýrri leiktíð er við Hoffenheim á heimavelli á laugardaginn.