Haaland hetjan og Norð­menn mæta Brössum

Erling Braut Haaland var hetja Norðmanna sem komust áfram í 16-liða úrslit á HM karla í fótbolta eftir 2-1 sigur á Fílabeinsströndinni í Dallas í Texas í dag.

Haaland var á meðal lykilmanna Norðmanna sem mættu ferskir til leiks eftir að hafa fengið hvíld í tapi þeirra norsku fyrir Frökkum í lokaleik riðlakeppninnar. Norðmenn voru sterkari aðilinn í leiknum gegn heldur bitlausum Fílbeinsstrendingum en leikurinn var heldur lokaður stóran part.

Antonio Nusa var hættulegasti leikmaður Norðmanna í leik dagsins en hann kom þeim norsku yfir með glimrandi fínu marki fimm mínútum fyrir leikhlé. Hann skar þá inn á völlinn af vinstri kanti og smurði boltann í skeytin fjær með hægri fæti frá vítateigshorninu.

1-0 stóð allt fram á 74. mínútu en þá jafnaði Amad Diallo, leikmaður Manchester United, metin en hann hafði skömmu áður bjargað á marklínu.

Útlit var fyrir framlengingu en fimm mínútum áður en venjulegur leiktími rann út átti Patrick Berg, leikmaðir Bodö/Glimt, frábæran sprett hægra megin og gaf boltann fyrir. Hann fann markamaskínuna Erling Haaland, sem var að venju réttur maður á réttum stað, og lagði boltann í netið af stuttu færi.

Haaland að skora í þrettánda keppnisleiknum í röð fyrir Noreg og þá var um að ræða sextugasta landsliðsmark hans í 53 landsleikjum. Þetta er ekki innsláttarvilla, 60 mörk, 53 leikir.

Diallo var nærri því að jafna úr aukaspyrnu í uppbótartíma en Örjan Nyland í marki Norðmanna varði frábærlega í skeytunum. Nær komust þeir frá Fílabeinsströndinni ekki.

Noregur vann leikinn 2-1 og fer áfram á kostnað Fílbeininga sem eru á heimleið.

Noregur mætir Brasilíu í 16-liða úrslitum þann 5. júlí næstkomandi á MetLife-vellinum í New Jersey.

Noregur er eina landsliðið í heiminum sem hefur mætt Brasilíu sem aldrei hefur tapað fyrir Brössum. Það er því von á áhugaverðum leik þar.