Guð­ný fæddi boltabarn níu mánuðum eftir EM

Pabbi stelpunnar er Pétur Hrafn Friðriksson sem einnig er fótboltamaður en þau Guðný hafa búið saman í Kristianstad í Svíþjóð, þar sem Guðný er leikmaður samnefnds félags.

„Pétursdóttir dreif sig í heiminn laugardaginn 18.apríl þar sem móðirin stóð sig alveg eins og hetja. Við erum í skýjunum með litlu dömuna okkar og getum ekki beðið eftir lífinu með henni,“ skrifaði Pétur Hrafn í færslu á Instagram.

Guðný fæddi dóttur sína um það bil níu mánuðum eftir að hafa spilað fyrir Íslands hönd á Evrópumótinu í Sviss síðasta sumar. Síðasti leikur hennar áður en hún fór í fæðingarorlof var hins vegar með Kristianstad gegn Malmö í lok september.

Guðný, sem er 25 ára Hornfirðingur, hefur spilað 43 A-landsleiki fyrir Íslands og farið á tvö stórmót. Hún lék með FH og Val hér á landi áður en hún fór í atvinnumennsku til Ítalíu og spilaði þar með AC Milan, og að láni hjá Napoli, en fór svo til Kristianstad fyrir tímabilið 2024.