Vara­maður Alberts skoraði sigur­markið

Fiorentina var mun hættulegri aðilinn allan leikinn en tókst ekki að skora fyrr en í uppbótartíma. Fram að því hafði liðið klúðrað tveimur dauðafærum og Alberti tókst ekki að skora úr sínum fjórum skotum.

Albert var síðan tekinn af velli á 85. mínútu fyrir Moise Kean sem setti sigurmarkið á annarri mínútu uppbótartíma.

Sigurinn var gríðarmikilvægur fyrir Fiorentina og lyfti liðinu upp í 18. sæti ítölsku deildarinnar.

Fjólubláa liðið frá Flórens hefur nú unnið tvo af síðustu þremur leikjum eftir að hafa mistekist að vinna sigur í fyrstu sextán leikjum tímabilsins. Nýi þjálfarinn Paolo Vanoli virðist loksins vera að snúa hlutunum við eftir erfiðan fyrsta mánuð í starfi.