Mikil­vægasti leikur í sögu Man. Utd

Hvort sem það verður United eða Tottenham sem landar sigri í kvöld þá mun sigurvegarinn setja leiðinlegt met með því að verða lægsta lið sinnar landsdeildar til að vinna Evrópukeppni.

Tottenham er í 17. sæti og hefur aðeins hlotið 38 stig úr 37 deildarleikjum, og ef liðið vinnur ekki Brighton á sunnudag verður þetta næstversta stigasöfnun í sögu liðsins. United er í 16. sæti eftir sína verstu stigasöfnun frá 1974, og þá verstu frá 1931 ef liðið vinnur ekki Aston Villa á sunnudaginn.

Liðin eru því bæði órafjarri því að ná Evrópusæti í gegnum ensku úrvalsdeildina en geta bjargað afar miklu með því að vinna Evrópudeildina og komast þannig í Meistaradeild Evrópu á næstu leiktíð.

Yfir hundrað milljónir punda í boði

Því myndi fylgja mikið fjármagn og eins og fram kemur í grein BBC er þá fé líklega enn mikilvægara fyrir United en Tottenham, vegna gríðarlegs tapreksturs og útistandandi skulda. Svo slæm er staðan að United hefur verið í hættu á að brjóta fjárhagsreglur ensku úrvalsdeildarinnar sem banna að taprekstur sé meiri en 105 milljónir punda yfir þriggja ára tímabil.

„Fjárhagslega séð þá er þetta mikilvægasti leikur í sögu félagsins [United],“ segir Kieran Maguire, sérfræðingur í fjármálum fótbolta, við BBC.

„Þátttaka í Meistaradeildinni skiptir sköpum því hún skilar yfir hundrað milljónum punda vegna miðasölu, sjónvarpsréttinda og bónusa frá styrktaraðilum,“ segir Maguire.

Mótvægi gegn gríðarlegum skuldum

United virðist vera að landa framherjanum Matheus Cunha frá Wolves en sigur í kvöld gæti skipt sköpum fyrir félagið upp á að styrkja leikmannahóp Rubens Amorim í sumar. Vinni liðið ekki gæti það orðið of háð því að ná að selja launaháa leikmenn eins og Marcus Rashford, Jadon Sancho og Antony sem allir voru lánaðir frá félaginu í vetur.

„United er enn með einn allra hæsta launareikninginn í ensku úrvalsdeildinni. Þeir eru með leikmannahóp sem kostaði yfir einn milljarð punda og mörgum af þessum samningum hefur verið náð með loforðum svo að félagið skuldar enn 300 milljónir punda í greiðslur,“ segir Maguire.

„Þess vegna þurfa þeir peningana sem Meistaradeild Evrópu skilar, og það er staðan jafnvel áður en byrjað verður að sækja leikmenn sem stjórinn vill fá. Auknar tekjur myndu setja félagið í mun sterkari stöðu varðandi alla enduruppbyggingu,“ segir Maguire.

Leikur Manchester United og Tottenham hefst klukkan 19 í kvöld, í beinni útsendingu á Vodafone Sport. Upphitun hefst hálftíma fyrr.