Biðst af­sökunar á að hafa kallað skemmdar­varginn „fífl“

Í ljós hefur komið að maðurinn sem vann skemmdarverkin glímir við andleg veikindi og beinir Kristján nú því til ríkisstjórnarinnar að nauðsynlegt sé að hlúa betur að fólki með geðæn vandamál. „Ríkisstjórn Íslands: Þið getið gert betur en þetta!“

Allar rúður mölvaðar

Fréttir bárust af því að morgni miðvikudagsins í síðustu viku að maður hefði að næturlagi brotið allar rúður í versluninni. 

Kristjáni var ekki skemmt vegna málsins og sagði meðal annars á samfélagsmiðlum daginn eftir að sumt fólk væri fífl. 

Lögregla sagði í samtali við fréttastofu daginn eftir að maðurinn glímdi við andleg veikindi og hafi margoft þurft að hafa afskipti af honum.

Hefur kynnt sér málið

Kristján birtir svo auglýsingu í morgun undir yfirskriftinni „AFSAKIГ.

„Ég sagði á Facebook að gerandinn væri fífl. Ég vil biðjast afsökunar og fyrirgefningar á að hafa sagt það. 

Á þessum tímapunkti þá brá mér, það var búið að eyðileggja og skemma fyrir mér það sem ég hef unnið hörðum höndum með fjölskyldu minni við að byggja upp. Fiskikóngurinn er eins og barnið mitt. Ég var sár, reiður og svekktur. Skrifaði þetta í reiði. 

Ég komst svo að því að viðkomandi ætti við geðrænan vanda að etja. Ég hef kynnt mér málefnin um geðraskanir undanfarna daga og veit betur núna. Hins vegar vil ég í dag segja að margir í þessari ríkisstjórn eru „FÍFL“ fyrir að hlúa ekki betur að fólki sem eiga við geðræna vandamál að etja. Ríkisstjórn Íslands: Þið getið betur en þetta!“

Hann segir að verslunin hafi fengið nýjar rúður og enginn hafi sem betur fer meiðst.

Að neðan má svo lesa færslu Kristjáns.

Stjórnvöld þurfa að fara að gera eitthvað í þessum málum.Hingað og ekki lengra.

Fólk með svona miklar geðraskanir þurfa á aðstoð að halda. Það verður að taka utan um þetta fólk.

Þarf að verða stórt slys, einhver jafnvel myrtur til þess að stjórnvöld opni augun !!

Ég skil ekki forgangsröðunina lengur í þessu landi.

Ef flestir sem starfa í stjórnmálum hér á landi væru að vinna fyrir mig þá væri ég búinn að reka þau.

Þetta eru enginn vinnubrögð.

Fólk ráfar hér um göturnar og er fárveikt.

Slíkt á ekki að líðast hér á landi.

Ég er búinn að koma þessu frá mér.

Núna eiga stjórnvöld að grípa inní. Það er þeirra starf.

Til þess eruð þið kosin af fólkinu í landinu.

Ég er einn af fólkinu í landinu.

Eigið góðan dag.

Kveðja

Kristján Berg