Diljá sló í gegn í Besta þættinum: „Þetta er ó­geðs­lega vont“

Diljá og Leifur Andri Leifsson, fyrirliði HK, mættu Blikunum Höskuldi Gunnlaugssyni og Stefáni Inga Sigurðarsyni.

„Mér er illt í tánni,“ kallaði Diljá fljótlega eftir að keppnin hófst, þar sem þátttakendur spörkuðu bolta í gegnum göt og spiluðu fótbolta-boccia, eftir að hafa svarað nokkrum spurningum. Söngkonan magnaða gaf nokkrum sinnum til kynna að fótboltaferill hennar væri talsvert styttri en keppinauta hennar.

„Þetta er ógeðslega vont. Eiga þessir skór ekki að vera að passa að þetta sé ekki svona sársaukafullt? Ég er komin með tár í augun,“ sagði Diljá og sýndi sjónvarpsvélinni það.

Hún sá hins vegar til þess að keppnin varð æsispennandi, rétt eins og síðast þegar Breiðablik og HK mættust í hreint ævintýralegum leik.

Þáttinn má sjá hér að neðan.

Leikur HK og Breiðabliks hefst í Kórnum kl. 19.15 og er að sjálfsögðu í beinni og veglegri útsendingu á Stöð 2 Sport.