„Það er Alma sem slær tóninn og hinir elta“

Til­efnið er pistill Gunnars Þórs Gísla­sonar, stjórnar­for­manns leigu­fé­lagsins Ölmu sem birtist á Vísi í dag. Þar segir hann meðal annars að ó­sann­gjarnt sé að ætla að ein­stök dæmi um miklar hækkanir á leigu­verði eigi við um allan markaðinn. Alma sé á engan hátt verð­leiðandi á leigu­markaðnum, með einungis fjögurra prósenta markaðs­hlut­deild.

Segir leig­endur geta hafnað hækkunum

Guð­mundur Hrafn Arn­gríms­son, for­maður Sam­taka leigj­enda, ræddi pistil Gunnars Þórs í Reykja­vík Síð­degis á Bylgjunni í dag. Hlusta má á við­talið neðst í fréttinni.

„Nú er það bara svo að lang­stærstur hluti þeirra erinda sem við fáum inn þar sem fólk er mjög hrætt um stöðu sína eru leigj­endur frá Ölmu, sem eru að fá miklar hækkana­til­kynningar og þetta er að hrúgast inn hjá þeim akkúrat núna.“

Guð­mundur segir að Sam­tök leigj­enda túlki húsa­leigu­lög þannig að ef að leigu­sali ætli að hækka húsa­leigu við nú­verandi eig­anda þá þurfi hann að sýna leigjandanum fram á að hann þurfi þess, sé miðað við 53. grein húsa­leigu­laga þar sem for­gangs­réttur leig­enda sé tryggður.

„Ef leigu­sam­bandið heldur á­fram þá má hann ekki hækka leigu­samninginn nema hann sýni fram á að hann þurfi þess. Þá getur hann annað hvort gert það með því að líta á markaðs­verð á svipaðri eign á sama stað eða sýna fram á kostnaðar­auka. Þeir gera það bara ekki og ég hvet bara leigj­endur Ölmu til þess að hafna hækkunum fyrir­tækisins vegna þess að það er hol­skefla í gangi núna.“

Segir Ölmu markaðs­ráðandi

Guð­mundur segir sam­tökin ekki fá slík erindi vegna annarra leigu­fé­laga. Meira og minna séu það allt leigj­endur Ölmu sem leiti til sam­takanna.

„Þetta eru meira og minna allt leigj­endur Ölmu sem að blöskrar þessar hækkanir sem eru langt um­fram verð­lag. Þetta fé­lag hefur mikil á­hrif,“ segir Guð­mundur.

„Þó að hann nefni þarna í greininni að fé­lagið sé nú bara fjögur prósent af markaðnum, þá er þetta markaðs­ráðandi fé­lag. Þetta er markaðs­ráðandi fé­lag bæði varðandi þróun á hús­næðis­leigu og ekkert síður þróun á fast­eigna­verði.“

Almennir leigusalar hækki líka

Að­spurður um al­menna leigu­sala á markaði og hvort þeirra hækkanir séu sam­bæri­legar hækkunum Ölmu segir Guð­mundur að verð­lags­eftir­lit sam­takanna sýni fram á það.

„Við erum að sjá það að húsa­leiga hefur hækkað tugi prósenta um­fram það sem hin opin­bera vísi­tala segir sem þýðir að hinn venju­legi leigu­sali hann er að fylgja þessari þróun. Það er Alma sem slær tóninn og hinir elta vegna þess að það er svo mikill skortur og svo mikil sam­keppni um í­búðir að leigu­salar sjá tæki­færi í því að hækka húsa­leigu.“

Hann segir af og frá að betra á­stand sé á leigu­markaði í dag heldur en áður. Tölur og kannanir sýni fram á það.

„Við erum að fá hérna kannanir trekk í trekk í trekk sem sýna fram á alveg skelfi­lega stöðu leig­enda. Skelfi­lega stöðu og fé­lags­legan harm.“