Elsti hundur heims við hestaheilsu

Gunnar Reynir Valþórsson skrifar 3. febrúar 2023 07:52

Þegar Bobi fæddist stóð til að lóga honum en börnin í fjölskyldunni földu hann til að forða honum frá því og síðan hefur hann verið tryggur vinur. Vísir/Heimsmetabók Guinness

Portúgalski hundurinn Bobi hefur komist á spjöld sögunnar sem elsti hundur allra tíma, en metið hefur verið staðfest af Heimsmetabók Guinness.

Bobi, sem er af tegundinni Rafeiro do Alentejo er orðinn þrítugur en meðalaldur slíkra hunda er tólf til fjórtán ár. Metið sem Bobi hefur nú slegið hefur staðið í rúm hundrað ár, en elsti hundur sögunnar, áður en Bobi var krýndur meistari var ástralski hundurinn Bluey sem varð 29 ára og fimm mánaða.

Stóð til að lóga Bobi

Blue kvaddi þennan heim hinsvegar árið 1939. Bobi fékk metið sitt skráð þann fyrsta febrúar síðastliðinn þegar hann hafði náð þrjátíu árum og 226 dögum. Eigandi hans segir að hann sé við hestaheilsu, miðað við aldur og fyrri störf en hann hefur verið hjá sömu fjölskyldu á vesturströnd Portúgals frá fæðingu. Raunar stóð til að lóga honum eins og öðrum úr gotinu þegar hann fæddist en börnin á heimilinu gripu þá til þess ráðs að fela hvolpinn og þegar upp komst var ákveðið að hann fengi að lifa.

Étur ekki hundamat

Hann segir að Bobi hafi ávallt borðað það sama og fjölskyldan leggi sér til munns og að hann fúlsi við hundamat úr dós. Líklegt er talið að langlífið sé genatengt, því móðir hans náði átján ára aldri.

Gæludýr Hundar Dýr

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.