Deschamps gæti orðið fyrsti þjálfarinn til að vinna HM tvisvar eftir seinna stríð

Þjálfari Frakka getur nefnilega orðið fyrsti þjálfarinn eftir seinna stríð til að vinna Heimsmeistaramótið tvisvar. Deschamps varð einnig heimsmeistari sem leikmaður þegar hann var hluti af frábæru frönsku landsliði sem vann á heimavelli árið 1998 en nú er tækifæri til að tryggja stall sinn enn frekar í sögubókunum.

Vittorio Pozzo stýrði Ítölum til sigurs á HM 1934 og 1938 og er sá eini sem hefur unnið mótið tvisvar. Pozzo er einnig í hóp með Deschamps yfir þjálfara sem hafa komist tvisvar í úrslitaleikinn á heimsmeistaramótinu ásamt tveimur öðrum þjálfurum. Carlos Bilardo fór með Argentínumenn tvisvar í röð í úrslitaleikinn og Franz Beckenbauer stýrði Vestur-Þýskalandi sömuleiðis í tvo úrslitaleiki í röð. Tveir síðastnefndu eiga það allir sameiginlegt að hafa tapað öðrum úrslitaleiknum.

Deschamps er þó hógvær þegar hann er spurður út í þennan möguleika og sagði „Ég er ekki mikilvægastur hérna. Það er liðið. Að sjálfsögðu er ég stoltur af því að eiga möguleika á að verja titilinn okkar. Þannig að þetta er magnað afrek nú þegar og við munum gera allt sem í okkar valdi stendur til að tryggja það að við séum hamingjusamara liðið á sunnudaginn. Ég hugsa samt ekki um sjálfan mig. Ég er ánægður með að hafa náð þessum árangri.“

Reuters fjallaði um málið.