Innlent

For­stjóri Icelandair krafinn skýringa á fundi í dag

Tryggvi Páll Tryggvason skrifar
Kallað verður eftir skýringum á tíðum töfum og aflýsingum á flugferðum Icelandair í innanlandsfluginu undanfarin misseri.
Kallað verður eftir skýringum á tíðum töfum og aflýsingum á flugferðum Icelandair í innanlandsfluginu undanfarin misseri. Vísir/Tryggvi Páll

Sveitarstjórnarfulltrúar á Norðurlandi eystra munu fjölmenna á fund með forstjóra Icelandair á Akureyri síðar í dag, þar sem hann verður krafinn skýringa á tíðum frestunum og aflýsingum á innanlandsflugi flugfélagsins.

Töluverðrar óánægju hefur gætt með með innanlandsflug Icelandair síðustu misseri, eins og rækilega hefur verið fjallað um í fjölmiðlum.

Á dögunum skrifuðu tveir bæjarfulltrúar á Akureyri grein á vef Akureyri.net, þar sem þeir röktu hvernig íbúar og atvinnurekendur á svæðinu finndu fyrir minnkandi trausti á innanlandsflug Icelandair, sökum tíðra aflýsinga eða frestana, oft með litlum fyrirvara. Spurðu þeir einfaldlega hvort að innnalandsflugið væri rúið trausti?

Bæjarfulltrúar á Akureyri kölluðu einnig eftir skýringum á málinu og mun Bogi Nils Bogason, forstjóri Icelandair, verða við kallinu í dag. 

Vilja endurnýja traustið

Mun hann funda með sveitarstjórnarfulltrúum allra sveitarfélaga á starfssvæði SSNE, Samtaka sveitarfélaga á Norðurlandi eystra, sem skipuleggur fundinn. Fundurinn verður haldinn á Akureyri, síðdegis í dag.

„Ástandið er kannski búið að vera sérstaklega slæmt undanfarið og fólk getur bara ekki treyst á að geta sótt sér þá þjónustu sem að þarf út fyrir svæðið,“ segir Lára Halldóra Eiríksdóttir, bæjarfulltrúi á Akureyri og formaður stjórnar SSNE, í samtali við Vísir.

Lára Halldóra Eiríksdóttir er bæjarfulltrúi á Akureyri og formaður SSNE.

Hún segir mikilvægt að það takist að endurnýja traust íbúa svæðisins á innanlandsfluginu, enda margir sem þurfa að nýta þjónustu sem aðeins er í boði á höfuðborgarsvæðinu.

„Það er þannig að fólk treystir því ekki eða er að ferðast á öðrum tíma heldur en að myndi henta því til þess að hafa tíma upp á hlaupa ef að þarf til læknis eða annað slíkt. Fólk treystir ekki lengur og það er ekki nógu gott,“ segir Lára Halldóra.

Hún vonast til þess að fundurinn hafi jákvæð áhrif á þjónustu Icelandair í innanlandsfluginu.

„Óskaniðurstaðan er auðvitað sú að þjónustan á einhvern hátt batni. Auðvitað veit maður það að á fundinum mun Bogi fara yfir skýringar og á öllum málum eru skýringur. En þetta eru fáar flugferðir á dag á milli og ekki hægt að treysta á það. Það er verið að fella þær niður fyrirvaralítið. Niðurstaðan sem við viljum er bara betri þjónusta og öruggari tenging á milli.“

Bogi Nils Bogason er forstjóri Icelandair Group. Hann er á norðurleið í dag.Stöð 2/Egill

Þá segir hún að ánægja ríki með að Bogi Nils hafi ákveðið að koma norður til fundar við fulltrúa svæðisins.

„Við erum mjög ánægð með það að hann skuli hafa tekið vel í það að koma hingað norður og eiga þetta samtal við okkur. Við teljum að það sé nauðsynlegt, að eiga samtalið. Það er forsenda alls.“


Tengdar fréttir

Ó­­á­­nægja með Icelandair á Akur­eyri

Bæjarfulltrúar á Akureyri hafa óskað eftir skýringum Icelandair á því hvers vegna flugfélagið hefur að undanförnu fellt niður flugferðir milli Reykjavíkur og Akureyrar með litlum fyrir vara. Forseti bæjarstjórnar segir ástandið vera óboðlegt.

Icelandair færst of mikið í fang og þurfi sam­keppni

Kári Jónasson, leiðsögumaður og fyrrverandi fréttamaður, segir að Icelandair þurfi samkeppni á innanlandsflugsmarkaði þar sem félagið hafi færst of mikið í fang. Samkeppni sé öllum til góðs.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.