Fótbolti

Einkunnir Íslands: Sandra maður leiksins

Íþróttadeild Vísis skrifar
Sandra Sigurðardóttir með eina af fjölmörgum vörslum sínum í leiknum.
Sandra Sigurðardóttir með eina af fjölmörgum vörslum sínum í leiknum. ANP via Getty Images

Ísland tapaði með afar svekkjandi hætti, 1-0 fyrir Hollandi í undankeppni HM ytra. Sigurmark Hollands kom í uppbótartíma og þýðir að Ísland fer ekki beint á HM heldur í umspil.

Ísland var í vörn nánast allan leikinn og var raunar ótrúlegt að Holland hafi ekki skorað fyrr. Sandra Sigurðardóttir var helsta ástæða þess en hún átti stórkostlegan leik í markinu og var maður leiksins.

Einkunnir íslenska liðsins má sjá að neðan.

Byrjunarlið

Sandra Sigurðardóttir, markvörður: 10

Líkt og EM varði Sandra eins og berserkur, þá sérstaklega í fyrri hálfleik. Var vandanum vaxin í hverju einasta skoti og hverri einustu fyrirgjöf. Svakaleg frammistaða og hún verðskuldaði að halda hreinu.

Guðný Árnadóttir, hægri bakvörður: 8

Sinnti varnarvinnunni vel í þéttum múr Íslands, sérstaklega í síðari hálfleiknum. Bjargaði frábærlega á línu í þeim fyrri.

Glódís Perla Viggósdóttir, miðvörður: 9

Stóð vaktina vel í vörn íslenska liðsins og tókst að halda Vivianne Miedema í skefjum framan af.

Ingibjörg Sigurðardóttir, miðvörður: 8

Varðist með öllu sem hún átti. Líkt og aðrir varnarmenn Íslands átti hún erfitt að spila boltanum í gegnum pressu hollenska liðsins.

Áslaug Munda Gunnlaugsdóttir, vinstri bakvörður: 6

Var í vandræðum á köflum enda sótti Holland að mestu upp hægra megin, sér í lagi í fyrri hálfleik. Er þekktari fyrir að vera góð sóknarlega en það fékk ekki beint að njóta sín í kvöld.

Sara Björk Gunnarsdóttir, miðjumaður: 7

Barðist og barðist en náði lítið að sýna gæði sín með boltann enda komst íslenska miðjan ekki nálægt boltanum.

Dagný Brynjarsdóttir, miðjumaður: 7

Svipaða sögu af henni að segja og Söru Björk að ofan.

Gunnhildur Yrsa Jónsdóttir, miðjumaður: 7

Sama og með Söru Björk og Dagnýju. Var tekin af velli eftir að hafa meiðst lítillega að því virtist. Var með tárin í augunum er hún gekk af velli.

Svava Rós Guðmundsdóttir, vinstri kantmaður: 5

Fékk ekki úr miklu að moða á meðan hún var inn á. Var meira í vörn en sókn enda hollenska liðið boltann nær allan fyrri hálfleikinn.

Sveindís Jane Jónsdóttir, hægri kantmaður: 6

Svipað og með aðra framherja liðsins, var meira í vörn en sókn. Maður hefði þó viljað sjá löng innköst Sveindísar Jane valda meiri usla en þau í raun gerðu. Átti góða spretti og var á köflum sú eina sem gaf varnarmönnum í yfirvinnu andrými. Afdrifaríkt klúður í dauðafæri á 75. mínútu.

Berglind Björg Þorvaldsdóttir, framherji: 5

Var rosalega einangruð upp á topp hjá íslenska liðinu og fékk bókstaflega úr engu að moða

Varamenn:

Selma Sól Magnúsdóttir - Kom inn fyrir Svövu Rós í hálfleik: 5

Hljóp mikið og sinnti varnarvinnunni af krafti. Hefði átt að stoppa fyrirgjöfina sem markið kom úr.

Elín Metta Jensen - Kom inn fyrir Berglindi Björgu á 80. mínútu

Spilaði of lítið til að fá einkunn.

Alexandra Jóhannsdóttir - Kom inn fyrir Gunnhildi Yrsu á 80. mínútu

Spilaði of lítið til að fá einkunn.




Fleiri fréttir

Sjá meira


×