Við­brögð­in sýna tang­ar­hald Trumps á Rep­úbl­ik­an­a­flokkn­um

Í forsetatíð sinni reyndi Donald Trump ítrekað að beita réttarkerfi Bandaríkjanna gegn andstæðingum sínum og gera löggæslustofnanir að pólitískum vopnum sínum, eins og bent er á í frétt New York Times. Nú þegar Alríkislögregla Bandaríkjanna (FBI) hefur gert húsleit á heimili hans í Flórída, halda Trump og bandamenn hans því fram að réttarkerfið sé pólitískt vopn andstæðinga hans.

Því hefur meðal annars verið haldið fram að Joe Biden, núverandi forseti, hafi verið meðvitaður um húsleitina fyrirfram.

Eins og fram kemur í frétt New York Times er ekkert sem bendir til þess að Joe Biden, núverandi forseti, hafi vitað af húsleitinni eða komið að henni með nokkrum hætti eða vitað af húsleitinni fyrirfram.

FBI gerði húsleit í Mar-A-Lago, sveitarklúbbi Trumps í Flórída þar sem hann býr, á mánudaginn. Fjölmiðlar vestanhafs segja að starfsmenn FBI hafi tekið tólf kassa af opinberum gögnum sem Trump tók með sér til Flórída þegar hann flutti úr Hvíta húsinu.Sum gagnanna voru merkt sem „Top Secret“ sem er ein hæsta leyndarskilgreining bandarískra stjórnvalda.

Þessi gögn hefðu samkvæmt lögum átt að fara til Þjóðskjalasafns Bandaríkjanna.

Trump heldur því fram að húsleit FBI, og aðrar rannsóknir sem að honum snúa, vegna viðskiptahátta hans í New York og viðleitni hans til að snúa niðurstöðum forsetakosninganna frá 2020, svo eitthvað sé nefnt, séu nornaveiðar og pólitískar ofsóknir.

Fengu ábendingu úr Mar-A-Lago

Fyrr á þessu ári skilaði Trump fimmtán kössum af gögnum til Þjóðskjalasafnsins en fleiri kassar eru sagðir hafa setið í kjallara Mar-A-Lago síðan þá. Wall Street Journal, og aðrir fjölmiðlar vestanhafs, segja rannsakendur þó hafa fengið ábendingu frá einhverjum í Mar-A-Lago um að enn væru leynileg gögn í Flórída. Þá höfðu starfsmenn dómsmálaráðuneytisins þegar lýst yfir efasemdum um að Trump og hans fólk hefði sagt rétt frá varðandi þau gögn sem hafði verið skilað.

Enn sem komið er, er lítið vitað um gögnin sem starfsmenn FBI tóku. Forsvarsmenn stofnunarinnar hafa ekkert sagt enn og Trump sjálfur hefur ekki birt afrit af leitarheimildinni og afrit af yfirliti yfir það hvað hald var lagt á í Flórída.

WSJ segir að aðstoðarmenn Trump hafi í vikunni leitað til lögmanna og reynt að finna einhverja til að taka að sér varnir Trump fyrir dómstólum, komi til þess. Miðillinn segir það vísbendingu um að málið gæti verið alvarlegt fyrir Trump.

Koma Trump til varnar

AP fréttaveitan segir vendingar þessarar viku, og úrslit forvala innan Repúblikanaflokksins á undanförnum vikum, sýna vel hve sterkt tak Trump hefur enn á Repúblikanaflokknum. Trump-liðar hafa meðal annars haldið því fram að starfsmenn FBI hafi mögulega komið sönnunargögnum fyrir í Mar-A-Lago og séu að reyna að koma sök á forsetann fyrrverandi.

Þetta hafa þingmenn á báðum deildum Bandaríkjaþings meðal annars tekið undir. Menn eins og Jim Jordan og Lindsey Graham hafa báðir tekið undir það að mögulegt sé að starfsmenn FBI hafi komið sönnunargögnum fyrir til að koma sök á Trump.

Sjá einnig: Trump-liðar kvarta undan „vopnvæðingu“ dómsmálaráðuneytisins

Öldungadeildarþingmaðurinn Marco Rubio, sem eitt sinn gagnrýndi Trump harðlega sem loddara, hefur sakað forsvarsmenn FBI um að grafa undan trúverðugleika opinberra stofnanna og trausti á réttarríkið og heillindi kosninga í Bandaríkjunum. Vísaði hann til annarra rannsókna FBI og annarra stofnana á Trump og mögulegu samstarfi framboðs hans með Rússum varðandi kosningarnar 2016.

Eins og flestir aðrir, hafa bandamenn Trumps engar upplýsingar um hvaða gögn voru tekin úr Mar-A-Lago né á hverju húsleitarheimildin byggði.

Húsleitin var samþykkt af hæst settu embættismönnum dómsmálaráðuneytisins og alríkisdómara. Starfsmenn FBI þurftu að sannfæra dómarann um að mögulega hefðu lög verið brotin og að vísbendingar um lögbrot gætu fundist með húsleitinni.

Aðrir hafa haldið því fram að Trump hafi sem forseti svipt öll gögnin leynd.

Það sagði Kash Patel, sem starfaði fyrir Trump í Hvíta húsinu, til að mynda í viðtali í vikunni. Vísaði hann til þess að í október árið 2020 hefði Trump svipt leynd af gögnum sem sneru að Rússarannsókninni svokölluðu og rannsókn FBI á tölvupóstum Hillary Clinton, mótframbjóðanda Trumps í kosningunum 2016.

Þingmenn og aðrir sem studdu Trump dyggilega og kölluðu eftir því að Hillary Clinton yrði fangelsuð fyrir að ranga meðhöndlun opinberra gagna, hafa nú lýst því yfir að Trump sé saklaus, að um nornaveiðar sé að ræða og að starfsmenn FBI séu líklega spilltir og reyni að koma sök á Trump.

Mátti veita Rússum leynilegar upplýsingar

Í grein Washington Post er rifjað upp að Trump svipti nokkrum sinnum hulunni af gögnum en þær skipanir hafi snúið að öðrum gögnum.

Þá er rifjað upp viðtal Breitbart við Patel frá því í maí, þegar fregnir bárust fyrst af því að Trump hefði tekið leynileg gögn úr Hvíta húsinu, að forsetinn hefði svipt leyndinni af fullt af gögnum áður en hann fór úr Hvíta húsinu. Lögmaður Hvíta hússins hafi hins vegar gleymt því að klára meðfylgjandi pappírsvinnu en það þýddi ekki að leyndinni hefði ekki verið svipt af gögnunum.

Þá sagði hann sem sagt að Trump hefði svipt leyndinni af gögnunum en það væru bara ekki til nein gögn um þá ákvörðun hans. Sérfræðingar segja það tæknilega vera löglegt, því forseti Bandaríkjanna hafi algert vald til að svipta leynd af alls kyns leynilegum gögnum.

Er vísað sérstaklega til atviks árið 2017. Það var degi eftir að Trump hafði rekið James Comey, fyrrverandi yfirmann FBI, til að reyna að binda enda á rannsókn stofnunarinnar á mögulegu samstarfi framboðs Trumps með Rússa við afskipti þeirra af forsetakosningunum 2016.

Þá tók Trump á móti Sergei Lavrov, utanríkisráðherra Rússlands, og Sergei Kislyak, þáverandi sendiherra Rússlands í Bandaríkjunum, í Hvíta húsinu. Á fundinum sagði Trump þeim frá leynilegum upplýsingum. Trump var harðlega gagnrýndur fyrir þann fund en þrátt fyrir það voru sérfræðingar nokkuð sammála um að sem forseti, hefði hann mátt veita Rússum upplýsingarnar og þar með svipta leyndinni af þeim.

Þyngdi sjálfur refsingu

Verði Trump fundinn sekur um að hafa brotið alríkislög með því að fjarlægja leynileg gögn úr Hvíta húsinu og neita að afhenda þau til Þjóðskjalasafnsins, gæti hann verið dæmdur í allt að fimm ára fangelsi. Það er samkvæmt lögum sem hann skrifaði sjálfur undir sem forseti.

Fyrir forsetakosningarnar árið 2016 gerði Trump það að herópi sínu að fangelsa ætti Hillary Clinton, mótframbjóðanda hans, fyrir að hafa notað persónulegan vefþjón fyrir opinbera tölvupósta er hún starfaði sem utanríkisráðherra í ríkisstjórn Baracks Obama.

Hún var aldrei ákærð og þegar James B. Comey, þáverandi yfirmaður FBI, lýsti því yfir að hún yrði ekki ákærð varð Trump ævareiður.