Innlent

Segir galið að hælis­leit­endur þurfi að færa sannanir fyrir kyn­hneigð sinni

Hallgerður Kolbrún E. Jónsdóttir skrifar
Jódís Skúladóttir, þingmaður Vinstri grænna, segir mikilvægt að fólk í valdastöðu passi orð sín.
Jódís Skúladóttir, þingmaður Vinstri grænna, segir mikilvægt að fólk í valdastöðu passi orð sín. Vísir/Vilhelm

Þingmaður Vinstri grænna segir galið að hinsegin hælisleitendur þurfi nokkurn tíma að færa sannanir fyrir kynhneigð sinni til að fá hæli hér á landi. Hann gagnrýnir orð vararíkissaksóknara um að nóg sé af hommum á Íslandi.

Í viðtali í kvöldfréttum í gær sagði Helgi Þorsteinsson Silva lögmaður frá því að stjórnvöld hafi sakað skjólstæðing hans um að ljúga til um kynhneigð sína og hafnað honum hæli. Héraðsdómur sneri við þeirri ákvörðun, þar sem sannað þótti að maðurinn væri samkynhneigður.

Helgi Magnús Gunnarsson vararíkissaksóknari deildi fréttinni á Facebook í gær og skrifaði að auðvitað ljúgi hælisleitendur til um kynhneigð sína. Þá spurði hann hvort einhver skortur væri á hommum á Íslandi.

„Þetta eru ákaflega döpur ummæli sem í raun dæma sig algjörlega sjálf. Þetta er auðvitað alvarlegt að fólk í valdastöðu, alveg frá botni og upp í topp í okkar kerfi, leyfi sér að tala með þessum hætti. Ég lít það mjög alvarlegum augum,“ segir Jódís Skúladóttir, þingmaður Vinstri grænna.

„Það var mjög óheppilega orðað, að það væri ekki þörf á fleiri hommum hérna. Ég held það sé ekki þörf á fleiri gagnkynhneigðum, hvítum, miðaldra körlum í stjórnunarstöðum. Ég held það sé alveg absalút þannig.“

Segir galið að fólk þurfi að færa sannanir fyrir kynhneigð sinni

Fram kom í viðtalinu við Helga Þorsteinsson Silva í gær að hinsegin hælisleitendur þurfi að ganga mjög langt til að sýna fram á kynhneigð sína. Oft sé kynhneigð þeirra dregin í efa þrátt fyrir að fólk sé í sambandi og jafnvel gift.

„Það er auðvitað bara galið að fólk þurfi á einhverjum tíma, í einhverjum tilfellum að sanna kynhneigð sína og það er auðvitað eitthvað sem gagnkynhneigt fólk þarf aldrei að gera,“ segir Jódís. 

„Ég vil benda á það að hér í okkar samfélagi, sem er talið framarlega og umburðarlynt að mörgu leyti, hér veigra mjög mörg sér við að gangast við sinni kynhneigð opinberlega. Fólk getur orðið fyrir útskúfun, aðkasti, ofbeldi og það í þessu opna og góða samfélagi.“

Kyn og kynhneigð séu fljótandi fyrirbæri

Helgi sagði í samtali við fréttastofu í dag að eðlilegt væri að yfirvöld rannsökuðu yfirlýsingar hælisleitenda um hinseginleika.

„Við getum rétt ímyndað okkur að ef þú ert flóttamanneskja, frá landi þar sem þín getur jafnvel beðið dauðadómur. Þú ert í lífshættu ef þú gengst við kynhneigð þinni er það augljóst að viðkomandi er ekki að auglýsa hana á samfélagsmiðlum, hefur ekki gengist við því opinberlega,“ segir Jódís. 

„Fyrir utan það að kyn og kynhneigð er mjög fljótandi fyrirbæri þannig að einhver getur búið í annað hvort gagnkynja sambandi eða hinsegin sambandi langt fram eftir ævi en svo uppgötvað eða farið að upplifa aðra kynhneigð eða nýjar tilfinningar. Þannig það að einhver eigi einhvern tíma að kasta fram einhverju vottorði og sönnunum er auðvitað bara fullkomlega galin hugmynd.“ 

Snýst um að hjálpa þeim sem í mestri hættu eru

Hún segir að uppi séu daprir tímar og bakslag hafi orðið í baráttu hinsegin fólks.

„Við erum að horfa á árásina í Osló, við erum að horfa til skertra kvenréttinda í Bandaríkjunum, sem er alltaf okkur hinsegin fólki beintengt því þá verðum við næst. Þannig að sem aldrei fyrr skiptir máli að við stöndum vaktina og þetta málefni er gríðarlega mikilvægt,“ segir Jódís. 

„Það er okkar sem umburðarlynd, herlaus þjóð að standa með þeim sem eru í mestri hættu og það höfum við gert: Konur, börn, fólk með fatlanir, hinsegin fólk. Fólk sem hefur minni tök á að bjarga lífi sínu í sínu heimalandi eða í kannski þeim löndum sem þau hafa viðkomu í. Við erum að reyna að horfa í þau tilfelli. Þetta snýst ekki um að við viljum hleypa einum hópi frekar. Þetta snýst um að við erum að horfa af mannúð og hinsegin fólk sem leitar hér hælis er margt hvert að flýja undan ástandi þar sem líf þeirra er í hættu.“

Jón Gunnarsson dómsmálaráðherra gagnrýndi orð Helga í dag og sagði mikilvægt að ákærendur standi undir virðingu og trausti almennings.

Sigríður Friðjónsdóttir ríkissaksóknari hafnaði viðtali vegna málsins.


Tengdar fréttir

Helgi segir sér þyki vænt um sam­kyn­hneigða og hafi aldrei haft neitt á móti þeim

Helgi Magnús Gunnarsson vararíkissaksóknari segir að sér þyki vænt um samkynhneigða og hann hafi aldrei haft neitt á móti þeim. Það megi þó ekki gera ráð fyrir að hælisleitendur, sem segist samkynhneigðir, segi satt til um það. Formaður Samtakanna 78 segir ummæli Helga skýrt merki um að fordómar séu til staðar innan kerfisins.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×