Innlent

„Út með þessa stjórn, hún hefur unnið heljarmikið tjón“

Bjarki Sigurðsson skrifar
Sigmundur Davíð Gunnlaugsson segir að með þessari ríkisstjórn hafi þjóðinn fengið köttinn í sekknum.
Sigmundur Davíð Gunnlaugsson segir að með þessari ríkisstjórn hafi þjóðinn fengið köttinn í sekknum. Vísir/Vilhelm

Sigmundur Davíð Gunnlaugsson, formaður og þingmaður Miðflokksins, segir að ríkisstjórnin hafi áorkað afar litlu á þeim fimm árum sem hún hefur verið við völd. Stjórnmál séu ekki sérsvið ríkisstjórnarinnar og nú sé „Covid-skjólið“ horfið.

Í ræðu sinni á eldhúsdegi taldi hann upp þrjátíu hluti sem hann kallaði kaldhæðnislega afrakstur ríkisstjórnarinnar. Hann snerti á nánast öllum stærstu málum síðustu ára, til dæmis á sölunni á Íslandsbanka, hvort eigi að færa flugvöllinn, borgarlínu og plastáhaldabann.

„Nú virðist Sjálfstæðisflokkurinn hafa falið hluta stjórnarandstöðunnar að endurskrifa frumvarp sitt um útlendinga sem kynnt var fyrir nokkrum árum sem nauðsynleg lagfæring á kerfinu. Á sama tíma hleypir hann í gegn frumvarpi sem er til þess fallið að auglýsa Ísland enn frekar sem áfangastað þeirra sem skipuleggja fólksflutninga. Mál sem gengur í berhögg við stefnu annarra Norðurlanda sem eru að reyna að ná stjórn á hverjir koma til landanna,“ segir Sigmundur.

Hann segist ekki vita hvort ríkisstjórnin nái að áorka fleiru á þeim tíma sem eftir er af þinginu. 

„Með þessari stjórn fengum við köttinn í sekknum. Því má segja um hana eins og sungið var um jólaköttinn. Út með þessa stjórn, hún hefur unnið heljarmikið tjón,“ segir Sigmundur.

Hér fyrir neðan má lesa ræðu Sigmundar í heild sinni.

Forseti og góðir landsmenn.

Við eldhúsdagsumræður er venjan sú að meta afrakstur ríkisstjórnar. Nú hefur þessi ríkisstjórn setið í nærri fimm ár ef með eru talin árin tvö þegar ríkisstjórnin fól sérfræðingaveldi stjórn landsins.

Það segir sína sögu að það voru bestu árin á ferli þessarar ríkisstjórnar.

En nú hefur hún misst covid-skjólið og tímabært að snúa sér aftur af stjórnmálum.

En það er reyndar ekki sérsvið þessarar ríkisstjórnar sem var mynduð úr einum vinstri flokki, einum fyrrverandi hægriflokki og einum tækifærissinnaflokki.

Lausnin átti að vera sú að starfa sem kerfisstjórn.

En þótt kerfið hafi að mestu fengið að ráða för hafa stjórnarflokkarnir brallað ýmislegt. Ég ætla að gera tilraun til að nefna 30 dæmi um „afrakstur“ ríkisstjórnarinnar á 6 mínútum:

1. Ríkisstjórnin tók U-beygju í bankamálum. Hún skilaði einum banka til vogunarsjóða og einkavæddi annan án þess að nota einstakt tækifæri til að endurskipuleggja fjármálakerfið í þágu almennings og fyrirtækja. Allir viðkomandi ráðherrar vöruðu sjálfa sig við, eða enginn. Þeir eru ósammála um það.

2. Ríkisstjórnin tók að sér að fjármagna kosningaloforð Samfylkingarinnar í Reykjavík um Borgarlínu án þess að nokkur hefði hugmynd um hvað framkvæmdin myndi kosta, hvað þá reksturinn.

3. Í samstarfi við borgarstjórn er ríkisstjórnin að hrekja Reykjavíkurflugvöll burt úr Vatnsmýrinni og hefur fengið sérstakar þakkir fyrir frá borgarstjóra.

4. Minni sveitarfélög eru síður í náðinni og ríkisstjórnin reyndi að ná fram lögþvinguðum sameiningum.

Margar aðgerðir ríkisstjórnarinnar snúast um hreint afturhald.

5. Umhverfisráðherra Sjálfstæðisflokksins talar nú fyrir umhverfisstefnu sem þótti of öfgakennd fyrir VG fyrir nokkrum árum.

6. Ríkisstjórnin lagði til BANN við vinnslu á olíu og gasi í íslenskri lögsögu og bann við RANNSÓKNUM á sama tíma og mikilvægi þess að Vesturlönd verði sjálfum sér næg um orku hefur aldrei verið meira.

7. Ríkisstjórnin ákvað að banna sjálfsagðar aðgerðir sem hafa bætt lífsgæði barna og fyrir lífstíð áratugum saman. Það er bann við ákveðnum framförum í læknavísindum.

8. Plastpokar voru bannaðir, plaströr og áhöld. Fyrir vikið þarf fólk í auknum mæli að neyta matar með viðarflísum. Þar með var þróunin á því sviði færð aftur fyrir bronsöld.

9. Þrátt fyrir að Ísland sé umhverfisvænasti orkuframleiðandi í heimi lá ríkisstjórninni svo á að toppa aðra í loftslagsmálum að ítrekað voru kynnt ný markmið -og markmiðin lögfest, á meðan gleymdist að huga að því að orkuskipti kalli á aukna orkuframleiðslu.

10. Rammaáætlun situr föst og hefur verið breytt í verkfæri til að koma í veg fyrir meira og minna allar umhverfisvænar framkvæmdir.

11. Ríkisstjórnin hefur verið í fjandskap við sjálfstætt starfandi heilbrigðisþjónustu og jafnvel sjálfboðaliðasamtök en unnið að fordæmalausri samþjöppun kerfisins. Af þessu leiðir meðal annars…

12. Biðlistar lengjast og í vikunni birti Ríkisendurskoðun algjöran áfellisdóm yfir frammistöðu stjórnvalda í geðheilbrigðismálum.

13. Loforð Framsóknarflokksins um nýjan Landspítala á nýjum stað stóð bara fram að því að kjörstöðum var lokað og var svikið áður en stjórnarmyndunarviðræður hófust.

14. Báknið stækkar og stækkar og hefur aldrei verið stærra. Eftir höfðinu dansa limirnir því forsætisráðuneytið hefur þanist út í tíð þessarar ríkisstjórnar, meira en það gerði áður á nokkrum áratugum.

15. Öll met hafa verið slegin í fjölgun pólitískra aðstoðarmanna ráðherra.

16. Ríkisstjórnin hefur eytt meiri peningum en nokkur ríkisstjórn í sögunni, peningum sem urðu til í tíð annarrar ríkisstjórnar. En um leið vantar hvata til tekjuöflunar og sparnaðar.

17. Nýtt íþyngjandi regluverk er innleitt af kappi að því marki að minni fyrirtæki þurfa að ráða til sín starfsfólk bara til að bregðast við sívaxandi kröfum ríkisins.

18. Gjöld og refsiskattar hækka. Horfið var frá stefnunni um að ríkið yrði ekki leiðandi í gjaldahækkunum við upphaf árs. Verðbólgan rýkur upp og eldsneyti hefur aldrei verið eins dýrt. En ríkisstjórnin þvertekur fyrir að draga úr refsisköttum og nýjum grænum gjöldum, jafnvel tímabundið.

19. Öll fimm árin hefur verið þrengt að landbúnaði. Nú þegar loksins er farið að ræða um fæðuöryggi af alvöru skipar ríkisstjórnin nefnd undir forystu Steingríms J. Sigfússonar eftir að hafa stöðvað tillögu Miðflokksins um sókn í matvælaframleiðslu ár eftir ár.

20. Matvælaráðherra segist ætla að taka á sjávarútvegsmálum en gerir það með því að skipa 46 manns í nefndir um málið.

21. Stjórnin rembist eins og rjúpan við staurinn við að leggja niður heila starfsstétt, leigubílstjóra, sem þó hafa þurft að mæta síauknum kröfum og gjöldum ár eftir ár.

22. Ítrekað er ráðist í lagasetningu um kynrænt sjálfdæmi án þess að líta á þætti eins og réttindi og öryggi kvenna, áhrif á kvennaíþróttir eða annað sem mikið er rætt í öðrum löndum.

23. Upp úr þurru ákvað ríkisstjórnin að setja heimsmet í hversu lengi mætti eyða fóstri. Forsætisráðherra sagði svo ítrekað að ganga ætti miklu lengra og leyfa fóstureyðingar fram að fæðingu barns. Hinir flokkarnir létu sig hafa það.

24. Velferð barna hefur verið gerð að pólitísku auglýsingaatriði en þegar afraksturinn er skoðaður virðast aðgerðirnar fyrst og fremst snúast um að breyta heitum stofnanna og færa til verkefni. Sem fyrr snýst allt um umbúðir frekar en innihald.

25. Loforð við eldri borgara hafa enn ekki verið efnd.

26. Ríkisstjórnin tekur við ítrekuðum skýrslum um aukið umfang skipulagðrar glæpastarfsemi án þess að svara neyðarkalli lögreglunnar um aukin úrræði.

27. Allt snýst um stóla -og því var ráðist í uppstokkun ráðuneyta að því marki að ráðherrarnir sjálfir virtust ekki gera sér grein fyrir hvað heyrði undir þá og jafnvel ekki hvað ráðuneytin hétu. Ráðherrar eru fyrir vikið fríspilandi, tala út og suður, oft í andstöðu við aðra ráðherra.

28. Á síðasta kjörtímabili fékk VG að reka ráðherra Sjálfstæðisflokksins úr ríkisstjórn. Ólíklegt er að það gæti gerst á hinn veginn.

29. Ísland er eina NATO-ríkið þar sem leiðtogi ríkisstjórnarinnar er andsnúinn aðild að bandalaginu.

30. Ríkisstjórnin hefur ítrekað slegið Norðurlandamet í hælisumsóknum þrátt fyrir að Ísland sé fjarlægasti áfangastaðurinn. Það bitnar á getu okkar til að hjálpa þeim sem þurfa mest á hjálp að halda, m.a. Úkraínumönnum nú, eins og dómsmálaráðherra viðurkenndi.

Þetta er því miður ekki tæmandi talning og þingstörfum er ekki lokið.

Nú virðist Sjálfstæðisflokkurinn hafa falið hluta stjórnarandstöðunnar að endurskrifa frumvarp sitt um útlendinga sem kynnt var fyrir nokkrum árum sem nauðsynleg lagfæring á kerfinu.

Á sama tíma hleypir flokkurinn í gegn frumvarpi sem er til þess fallið að auglýsa Ísland enn frekar sem áfangastað þeirra sem skipuleggja fólksflutninga.

Mál sem gengur í berhögg við stefnu annarra Norðurlanda sem eru að reyna að ná stjórn á hverjir koma til landanna.

Hver veit hvaða önnur afrek þessi ríkisstjórn mun ná að klára á þeim stutta tíma sem er eftir af þinginu, svo ekki sé minnst á næstu ár.

Með þessari stjórn fengum við köttinn í sekknum. Því má segja um hana eins og sungið var um jólaköttinn.

Út með þessa stjórn, hún hefur unnið heljarmikið tjón.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×