Fótbolti

Hákon Arnar kom FCK á bragðið og titillinn er í aug­sýn

Runólfur Trausti Þórhallsson skrifar
Hákon Arnar Haraldsson og Ísak Bergmann Jóhannesson eiga stóran þátt í því að FC Kaupmannahöfn er hársbreidd frá danska meistaratitlinum.
Hákon Arnar Haraldsson og Ísak Bergmann Jóhannesson eiga stóran þátt í því að FC Kaupmannahöfn er hársbreidd frá danska meistaratitlinum. Lars Ronbog/Getty Images

FC Kaupmannahöfn vann gríðarlega mikilvægan 2-0 útisigur á Randers í baráttunni um danska meistaratitilinn í fótbolta. Hákon Arnar Haraldsson kom FCK á bragðið en liðið er nú hársbreidd frá því að vinna dönsku úrvalsdeildina.

Ísak Bergmann Jóhannesson og Hákon Arnar voru báðir í byrjunarliði FCK í dag en Ísak Bergmann skoraði bæði mörkin í gríðarlega mikilvægum sigri á dögunum. Nú var hins vegar komið að Hákoni Arnari að stela fyrirsögnunum.

Eftir markalausan fyrri hálfleik nældi Ísak Bergmann sér í gult spjald áður en Hákon Arnar kom gestunum frá Kaupmannahöfn yfir þegar klukkustund var liðin. Skagamaðurinn ungi fékk þá frábæra sendingu frá Rasmus Falk Jensen milli varnarmanna Randers, tók vel við boltanum og smellti honum óverjandi í hægra hornið frá vítateigslínunni.

Frábært - og mjög mikilvægt - mark í alla staði og staðan orðin 1-0 gestunum í vil. Heimamenn fengu kjörið tækifæri til að jafna metin tíu mínútum síðar þegar vítaspyrna var dæmd þeim í hag. 

Stephen Odey fór á punktinn en brenndi af og staðan því enn 0-1. Þegar tvær mínútur voru komnar fram yfir venjulegan leiktíma gulltryggði svo Khouma Babacar sigur FCK með öðru marki liðsins. Lokatölur í Randers 0-2 og Kaupmannahafnarliðið komið með níu fingur á titilinn.

FCK trónir á toppi deildarinnar með 65 stig eftir 31 leik. Midtjylland kemur þar á eftir með 59 stig og leik til góða en liðið er með mun lakari markatölu en FCK. Það þarf því gríðarlega mikið að ganga á til að titillinn endi ekki í Kaupmannahöfn.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.