Fótbolti

Verða með útileikmann í markinu í kvöld

Sindri Sverrisson skrifar
Salim Ben Boina hefur verið aðalmarkvörður Kómoreyja en meiddist og getur ekki spilað gegn Kamerún í kvöld.
Salim Ben Boina hefur verið aðalmarkvörður Kómoreyja en meiddist og getur ekki spilað gegn Kamerún í kvöld. Getty/Ulrik Pedersen

Kómoreyjar, sem nú upplifa Öskubuskuævintýri í Afríkukeppninni í fótbolta, verða án allra markvarða sinna í leiknum við Kamerún í kvöld.

Kómoreyjar komust áfram á mótinu með því að vinna óvænt Gana 3-2, og mæta Kamerún í 16-liða úrslitum í kvöld, í sennilega stærsta leik sínum frá upphafi.

Aðalmarkvörður Kómoreyja, Salim Ben Boina, meiddist hins vegar í sigrinum gegn Gana og varamarkverðirnir Moyadh Ousseini og Ali Ahamada smituðust báðir af kórónuveirunni.

Í morgun greindist Ahamada hins vegar með neikvætt sýni en nú er komið í ljós að engu að síður má hann ekki spila leikinn í kvöld.

Kómoreyjamenn munu því tefla fram útileikmanni í markinu og sá hefur verið valinn, eins og aðstoðarþjálfarinn Jean-Daniel Padovani sagði í gær:

„Við höfum þegar valið útileikmann sem verður í markinu. Hann hefur sýnt okkur á æfingum að hann getur spilað sem markvörður,“ sagði Padovani en gaf ekki upp hver útileikmaðurinn væri.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.