Innlent

Telur rétt að endur­vekja vist­heimilis­nefnd vegna á­sakana um illa með­ferð á börnum

Berghildur Erla Bernharðsdóttir skrifar
Halldór Þormar Halldórsson starfsmaður Sýslumannsins á Norðurlandi eystra og umsjónarmaður með sanngirnisbótum telur að vistheimilisnefnd hafi ekki verið búin að ljúka öllum sínum rannsóknum á heimilum þar sem grunsemdir voru um að börn hefðu sætt illri meðferð.
Halldór Þormar Halldórsson starfsmaður Sýslumannsins á Norðurlandi eystra og umsjónarmaður með sanngirnisbótum telur að vistheimilisnefnd hafi ekki verið búin að ljúka öllum sínum rannsóknum á heimilum þar sem grunsemdir voru um að börn hefðu sætt illri meðferð. Vísir

Umsjónamaður sanngirnisbóta segir að nýjar ásakanir um illa meðferð barna á vistheimilum komi sífellt fram og því rétt að endurvekja störf vistheimilinefndar. Málin hafi ekki verið kláruð á sínum tíma. Hann hefur áránna rás fengið kvartanir um Hjalteyrarheimilið.

Vistheimilisnefnd var skipuð af forsætisráðherra árið 2007 eftir að Breiðavíkurmálið svokallaða kom upp. Nefndin rannsakaði alls átta vistheimili þar sem grunsemdir voru um illa meðferð á börnum. Nefndin var lögð niður á síðasta ári. 

Halldór Þormar Halldórsson starfsmaður  Sýslumannsins á Norðurlandi eystra og umsjónarmaður með sanngirnisbótum telur að nefndin hafi ekki alveg verið búin að ljúka öllum sínum rannsóknum.

„Það eru alltaf að koma upp ný  mál  þannig að þessi mál voru ekki alveg kláruð á sínum tíma,“ segir Halldór. 

Hafi aldrei getað brugðist við

„Ég þekki ekki hvað bjó að  baki ákvarðana vistheimilisnefndar um hvaða heimili yrðu könnuð á sínum tíma.  En þegar ég tek við því starfi að kalla inn sanngirnisbætur þá komu töluvert af umsóknum og gögnum sem vörðuðu önnur heimili sem voru ekki könnuð. Það var aldrei hægt að greiða út bætur til þeirra því  sú krafa var gerð  í lögum að vistheimilisnefnd hafi gert könnun á störfum heimilisins,“ segir Halldór.

Jón Björnsson fyrrverandi félagsmálastjóri á Akureyri gerði margvíslegar athugasemdir við barnaheimilið á Hjalteyri á sínum tíma. Barnaverndarráð Íslands tók þær ekki alvarlega.Vísir/Sigurjón

Halldór segist hafa fengið all nokkrar ábendingar um barnaheimilið á Hjalteyri í áranna rás og umsóknir um sanngirnisbætur.

„Ég er búinn að þekkja Hjalteyrarmálið lengi og mál sem tengjast Arnarholti og Laugarlandi en því miður var aldrei hægt að bregðast við. Einfaldlega af því vistheimilisnefnd rannsakaði ekki þessi heimili. En alltaf þegar mér bárust ásakanir  um illa meðferð á börnum vakti ég athygli á því á einn eða annan hátt,“ segir Halldór. 

Bæjarstjórar vilja skoða starfsemi hjónanna

Hann telur að endurvekja eigi vistheimilisnefnd svo hægt séð að klára að fara yfir málin.

 „Það gæti verið lausn að endurvekja slíka nefnd en  breyta um form á starfseminni þannig að hún verði einfaldari. Því það var galli á störfum nefndarinnar á sínum tíma að þau voru mjög tímafrek. Það hafa þegar komið fram nokkrar þingsályktanir um að gera heildarúttektir á dvöl barna á vistheimilum á síðustu öld en hingað til hafa þær ekki náð fram að ganga. Sveitarfélög geta hins vegar alltaf sjálf rannsakað starfsemi slíkra heimila,“ segir Halldór.

Hjónin Einar og Beverly Gíslason sem ráku barnaheimili á Hjalteyri á árunum 1972 -1979 hafa  verið ásökuðu um grimmdarlegt ofbeldi síðustu daga af hálfu þeirra sem dvöldu þar á sínum tíma. Þau ráku svo dagheimili-og leikskóla í Garðabæ á árunum 1995-2015. 

Bæjarstjóri Garðabæjar sagði í fréttum í gær að starfsemin yrði rannsökuð vegna þeirra upplýsinga sem nú hafa komið fram um illa meðferð þeirra á börnum á áttunda áratugnum. Þá studdi bæjarstjóri Akureyrar að slík rannsókn yrði gerð á Hjalteyrarheimilinu á áttunda áratug síðustu aldar en barnavernd Akureyrar var meðal þeirra sem sendi börn þangað á sínum tíma. 


Tengdar fréttir

Vill láta rannsaka málefni Hjalteyrarheimilisins

Bæjarstjóri Akureyrar telur að rannsaka eigi málefni barnaheimilisins á Hjalteyri eftir að fólk sem þar dvaldi sem börn hefur stigið fram. Þar lýsir fólkið hræðilegu kynferðislegu,líkamlegu og andlegu ofbeldi sem það varð fyrir. 

Barnaverndarráð Íslands sópaði kvörtunum út af borðinu

Fyrrverandi félagsmálastjóri Akureyrar segir Barnaverndarráð Íslands ekki hafa tekið kvartanir  sínar um barnaheimilið á Hjalteyri alvarlega. Málinu hafi verið sópað út af borðinu. Hefði hann vitað af kynferðislega ofbeldinu sem nú hefur verið greint frá hefði málið alltaf verið kært til lögreglu. 

Garða­bær mun rann­saka dag­heimili hjónanna frá Hjalt­eyri

Bæjarstjóri Garðabæjar segir að starfsemi hjóna, sem ráku barnaheimili á Hjalteyri á áttunda áratugnum, við barnagæslu í Garðabæ verði rannsökuð. Bærinn taki frásagnir um ofbeldi af hálfu hjónanna mjög alvarlega og starfsemi þeirra verði rannsökuð af viðeigandi aðilum. 

„Þetta var hreinasta helvíti“

Maður sem sætti miklu ofbeldi af hálfu hjóna sem ráku barnaheimili á Hjalteyri á áttunda áratug síðustu aldar segir stórundarlegt að hjónin hafi áfram fengið leyfi til að gæta barna í Garðabæ. Foreldrar barna sem voru með börn sín í vistun hjá þeim eru ósáttir við að Garðarbær hafi ekki stöðvað hjónin.

Martröðin á barnaheimilinu á Hjalteyri

Kynferðislegt, líkamlegt og andlegt ofbeldi tíðkaðist árum saman gagnvart börnum sem dvöldu hjá hjónum sem ráku barnaheimili á Hjalteyri í Hörgársveit á áttunda áratug síðustu aldar. Fólk sem þar var sem börn hefur ítrekað, án árangurs, reynt að ná eyrum yfirvalda til að fá heimilið rannsakað. Prestar sem voru í barnaverndarnefndum á sínum tíma gáfu heimilinu samþykki sitt þrátt fyrir að hafa fengið ábendingar um að þar væri ekki allt með felldu.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×