Hundrað smitaðir eftir villi­bráðar­kvöld í Garða­bæ

Tvö hundruð manns greindust með kórónuveiruna í gær innanlands en aldrei hafa jafn margir greinst með veiruna á einum degi. Þórólfur Guðnason sóttvarnalæknir segir stöðuna erfiða.

„Við erum bara áfram í þessum mikla vexti og við erum bara að slá á hverjum degi nýtt met í fjölda smita. Við erum að sjá líka svona hópsmit koma kannski sérstaklega upp í svona samkvæmum og hlaðborðum hérna á höfuðborgarsvæðinu til dæmis.“

Þannig hafi margar hópsýkingar komið upp í þessari bylgju faraldursins. Ein hópsýking sem ekki enn sér fyrir endann á kom upp í síðustu viku út frá villibráðahlaðborði sem Íþróttafélagið Stjarnan hélt í Garðabæ.

„Tæplega eitt hundrað manns sem hafa smitast bæði beint og óbeint út frá þeim viðburði.“

Staðan versnar frá degi til dags

Aðeins 38,5% þeirra sem greindust með veiruna í gær voru í sóttkví. Þórólfur segir stöðuna hafa hríðversnað undanfarið.

„Hún versnar bara frá degi til dags og hérna útbreiðslan er að verða meiri og meiri. Það er bara erfiðara að hafa yfirsýn yfir þetta og hérna við vitum svo sem ekki hvað gerist á spítalanum. Enn þá er staðan svona þokkaleg hvað varðar inniliggjandi sjúklinga. Það eru sextán inniliggjandi á Landspítalanum og þar af þrír á gjörgæslu.“

Þórólfur segir að ákall sitt um að fólk passi sig betur hafi ekki skilað árangri.

„Mér finnst staðan vera orðin það slæm að mér ber skylda, bara lagaleg skylda, til þess að koma með tillögur til ráðherra um aðgerðir og það er bara í símunum,“ segir Þórólfur.

Reiknar með beinhörðum tillögum

Hann ætlar að skila Svandísi Svavarsdóttur heilbrigðisráðherra minnisblaðinu fyrir helgina. Síðast voru þrjár leiðir ræddar í minnisblaðinu. Þórólfur sér ekki fyrir sér að fara þá leið aftur.

„Ég mun sennilega vera með beinharðar tillögur eins og ég hef gert áður frekar en að vera með mismunandi möguleika,“ segir Þórólfur.

Hann vill lítið gefa upp um innihald minnisblaðsins líkt og áður en segir aðgerðir sem áður hafi verið gripið til sýna hvað virki.

„Ég minni enn á aftur á það að fyrir ári síðan þá vorum við með tiltölulega fá smit, tuttugu þrjátíu smit, okkur þótti það bara mjög mikið. Þá vorum við með mjög harðar aðgerðir í gangi. Við vorum með þarna fyrst tíu manna fjöldamörk og svo fórum við upp í tuttugu og svona. Þannig hefur þetta verið. Ég er ekki að segja að við þurfum endilega að fara í slíkar harðar aðgerðir núna en með því sjáum við hvaða árangri við náum. Ef við beitum vægum aðgerðum þá tekur þetta bara lengri tíma og verður svona sársaukameira og erfiðara. Ef við grípum til harðari aðgerða þá væntanlega mundi það standa styttra yfir og náum tökum á þessu fyrr og getum þá aflétt fyrr. Á sama tíma og við erum að reyna að ná meira ónæmi í samfélaginu með örvunarbólusetningu. En á endanum er þetta alltaf ákvörðun stjórnvalda hvaða leið verður farin.“