Tugir þúsunda syrgja vinsælustu söngkonu Brasilíu

Heimir Már Pétursson skrifar 7. nóvember 2021 09:45

Aðdáendur og fjölskylda söngkonunnar ungu syrgja fráfall hennar. Tugir þúsunda mættu á minningarathöfn í borginni Goiana í gær til að votta henni virðingu sína. Mynd/AP

Tugir þúsunda aðdáenda brasilísku söngkonunnar Marília Mendonça komu saman í heimaborg hennar Goiania í morgun til að minnast hennar en hún fórst í flugslysi á föstudag aðeins 26 ára gömul.

Flugvélin var á leið frá Goiania til Caratinga norður af Rio de Janeiro þegar hún fórst. Auk söngkonunnar fórust fjórir aðrir farþegar, þeirra á meðal frændi hennar og framleiðandi hennar. Mendonça er vinsælasta dægurlagasöngkona Brasilíu.

Marilia Mendonça var ein vinsælasta dægurlagasöngkona Brasilíu. Hún lék kántrítónlist sem kallast sertanejo í heimalandi hennar.Mynd/AP

Syrgjendur tóku að safnast saman fyrir framan íþróttahöll í heimaborg hennar strax á föstudag en minningarathöfn um hana fór fram í íþróttahöllinni í gær þar sem kista hennar var. Tugir þúsunda aðdáenda biðu í röðum í steikjandi hita fyrir utan íþróttahöllina eftir því að komast að kistunni til að votta söngkonunni virðingu sína.

Marília Mendonça var kántrísöngkona og mikill feministi og fjölluðu textar hennar margir um valdeflingu kvenna og andúð á heimilisofbeldi. Hún var á leið að halda tónleika þegar flugvél hennar fórst en ekki liggur fyrir hvað varð til þess að flugvélin hrapaði neðan við foss.

Skömmu fyrir brottförina póstaði Mendonca myndbandi af sér þar sem hún var á leið um borð í flugvélina.

Brasilía Tónlist

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.