Síðasti landsleikur Arnars eina skiptið sem við höfum tapað fyrir Liechtenstein

Ísland á að vinna Liechtenstein og gerði það með sannfærandi hætti í fyrri leiknum úti í Liechtenstein þar sem íslensku strákarnir unnu 4-1. Staðan á íslenska liðinu í dag er hins vegar allt önnur fyrir þetta uppgjör milli tveggja neðstu liða riðilsins.

Arnar Þór Viðarsson, landsliðsþjálfari, lék á sínum tíma 52 A-landsleiki en hann endaði landsliðsferil sinn á októberkvöldi á Rheinpark í Liechtenstein. Arnar lék þá allar níutíu mínúturnar í 3-0 skelli Íslands á móti heimamönnum.

Mario Frick kom heimamönnum í 1-0 á 28. mínútu og varamaðurinn Thomas Beck innsiglaði sigurinn með tveimur mörkum á þriggja mínútna kafla undir lok leiksins.

Þetta eru ein verstu úrslitin í sögu íslenska landsliðsins og síðasti landsleikurinn sem Eyjólfur Sverrisson stjórnaði. Ólafur Jóhannesson tók við landsliðinu í framhaldinu og Arnar var aldrei aftur valinn í landsliðið þrátt fyrir að vera ekki orðinn þrítugur á þessum tíma.

Arnar og Eiður Smári Guðjohnsen voru meðal fjögurra byrjunarliðsmanna í Liechtenstein sem voru ekki valdir í hópinn í næsta leik (þann fyrsta undir stjórn Ólafs Jóhannssonar) en Eiður Smári tók þá út leikbann. Hinir voru þeir Ívar Ingimarsson og Jóhannes Karl Guðjónsson.

Eiður Smári spilaði 38 landsleiki til viðbótar á sínum ferli en líkt og Arnar Þór þá voru spiluðu þeir Ívar og Jóhannes Karl ekki aftur fyrir íslenska landsliðið. Ívar var 30 ára en Jóhannes Karl aðeins 27 ára.

Eftir fjóra heimaleiki í röð án sigurs og með ungt og vængbrotið lið þá óttast margir að íslenska liðið gæti möguleika lent í vandræðum með neðsta lið riðilsins.

Þeir Arnar Þór og Eiður Smári verða að finna farsælar lausnir fyrir leikinn í kvöld. Liðið hefur enn ekki unnið heimaleik undir þeirra stjórn og það er því kominn tími á einn sigur í Laugardalnum í kvöld.