Eiður Smári um synina tvo: Ég hefði helst viljað reima á mig takkaskóna líka

Guðjón Guðmundsson hitti Eið Smára eftir blaðamannafund landsliðsþjálfaranna í gær og spurði hann meira út í drengina.

„Þetta er sérstök tilfinning. Ég verð að viðurkenna það. Sveinn Aron hefur verið í hóp hjá okkur áður og spilað. Andri Lucas kom inn í síðasta hóp og kom virkilega sterkur inn,“ sagði Eiður Smári.

„Það eru framherjar sem eru kannski framar í goggunarröðinni ef við nefnum Alfreð (Finnbogason) og fleiri. Ef allir væri heilir þá er ég ekkert viss um að mínir tveir væru í hópnum en þetta er staðan sem er uppi í dag. Það verður frábært að sjá hvort þeir bræður ná að tengja eitthvað saman,“ sagði Eiður Smári.

Gaupi vildi vita hvernig Eiður Smári horfir á þeirra framtíð í landsliðinu.

„Það er algjörlega undir þeim komið. Þeir hafa mikla hæfileika og mikinn líkamlegan styrk. Ef allt þróast vel og þeir eru heppnir með meiðsli og annað þá eiga þeir glæsta framtíð fyrir sér, bæði hjá félagsliðum og svo vonandi landsliðinu,“ sagði Eiður Smári.

„Menn þurfa að vinna sér inn sæti í landsliðinu og þeir þurfa að sjá til þess,“ sagði Eiður Smári. Þetta kitlar pabbahjartað.

„Ég hefði helst viljað reima á mig takkaskóna líka. Það er liðin tíð auðvitað. Ég viðurkenni það að þegar Andri Lucas skorar sitt fyrsta landsliðsmark í síðasta glugga þá kom smá pabbafílingur í mig á hliðarlínunni í alla vega tíu til fimmtán sekúndur. Á endanum er ég bara þjálfari þeirra á meðan við erum hér saman,“ sagði Eiður Smári.

Eiður Smári á einn strák í viðbót en Daníel Tristan er fimmtán ára gamall. Gaupi spurði hvort það væri langt í hann.

„Hann spilar með yngri landsliðum og hefur staðið sig nokkuð vel. Hann stendur sig vel í Real Madrid líka. Hver veit hvort þeir verði þrír á einhverjum tímapunkti,“ sagði Eiður Smári.

„Ég hef kannski ekkert hugsað út í það hvernig við fórum að þessu ég og Ragga á sínum tíma en eitthvað gott kom út úr þessu,“ sagði Eiður Smári.

Það má sjá allt viðtalið við Eið Smára hér fyrir ofan.