Einn látinn og tólf særðir í skotárás í Bandaríkjunum

Samúel Karl Ólason skrifar 23. september 2021 21:21

Árásarmaðurinn skaut þrettán manns og þar af dó minnst einn. AP/Patrick Lantrip

Minnst einn er látinn og tólf særðir eftir skotárás í matvöruverslun í Tennessee í Bandaríkjunum. Árásarmaðurinn hóf skothríð í Kroger-verslun í Collierville, sem er úthverfi Memphis. Þegar lögregluþjóna bar að garði komu þeir að árásarmanninum látnum.

Hann virðist hafa svipt sig lífi, samkvæmt lögreglunni í Collierville.

Fyrsta tilkynningin um árásina barst til lögreglu klukkan 13:30 að staðartíma, samkvæmt frétt New York Times. Fyrstu lögregluþjónarnir mættu í verslunina fjórum mínútum síðar.

Fyrstu lögregluþjónarnir fóru gang frá gangi í versluninni og hjálpuðu særðu fólki og öðrum sem höfðu falið sig. Sumir höfðu falið sig í kæliskápum og skrifstofum í versluninni.

Dale Lane, lögreglustjóri Collierville, segir þetta „hræðilegasta“ atburð í sögu bæjarins. Enn sem komið er liggur ekki fyrir af hverju maðurinn hóf skothríðina né hvernig byssu hann beitti.

Bandaríkin Skotárásir í Bandaríkjunum

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.