Fótbolti

Breiðablik í styrkleikaflokki með Lyon og Wolfsburg

Valur Páll Eiríksson skrifar
Blikakonur eru í góðum félagsskap.
Blikakonur eru í góðum félagsskap. Vísir/Hulda Margrét

Kvennalið Breiðabliks í fótbolta tryggði sér sæti í riðlakeppni Meistaradeildar Evrópu með öruggum 3-0 sigri á Króatíumeisturum Osijek á Kópavogsvelli í kvöld. Eftir úrslit kvöldsins er ljóst að Blikakonur verða í öðrum styrkleikaflokki þegar dregið verður í riðlakeppnina.

Eftir sigur Blikakvenna í kvöld lá fyrir að liðið færi annað hvort í annan eða þriðja styrkleikaflokk. Það valt á úrslitum í leik Twente og Benfica hvort yrði, en Twente er hærra skrifað en Breiðablik samkvæmt styrkleikalista UEFA en Benfica töluvert lægra.

Cloé Lacasse, fyrrum framherji ÍBV, skoraði þrennu í 4-0 sigri Benfica og því ljóst að Breiðablik færi í annan styrkleikaflokk. Breiðablik er lægst skrifaða liðið þar með 17.000 styrkleikastig, 0.900 meira en Svíþjóðarmeistarar Häcken sem eru efstir í þriðja styrkleikaflokki.

Engin smálið deila öðrum styrkleikaflokknum með Breiðabliki. Sjöfaldir Evrópumeistarar Lyon, lið Söru Bjarkar Gunnarsdóttur, sem unnu keppnina fimm ár í röð frá 2016 til 2020 væru undir eðlilegum kringumstæðum í efsta flokki en þar sem Paris Saint-Germain vann frönsku deildina í fyrra er Lyon í flokki fyrir neðan.

Wolfsburg, fyrrum lið Söru Bjarkar, væri einnig í efsta styrkleikaflokki ef litið er til styrkleikaröðunar UEFA en hlutu silfur í Þýskalandi, á eftir Bayern Munchen, og eru því einnig í öðrum styrkleikaflokki í ár. Þá er Arsenal frá Englandi einnig í þeim flokki og því ljóst að Breiðablik mætir engu þeirra liða í riðlakeppninni.

Dregið verður í riðlakeppnina mánudaginn næst komandi, 13. september og spennandi verður að sjá hvað kemur upp úr hattinum. Keppni í riðlakeppnini hefst í október.

Að neðan má sjá styrkleikaröðunina fyrir riðlakeppnina sem fram undan er. 

Styrkleikaflokkur 1

Barcelona (Spánn) - 104.800 stig

Paris Saint-Germain (Frakkland) - 85.400 stig

Bayern Munchen (Þýskaland) - 84.100 stig

Chelsea (England) - 70.700 stig

Styrkleikaflokkur 2

Lyon (Frakkland) - 124.400 stig

Wolfsburg (Þýskaland) 97.100 stig

Arsenal (England) - 27.700 stig

Breiðablik (Ísland) - 17.000 stig

Styrkleikaflokkur 3

Häcken (Svíþjóð) - 16.100 stig

Juventus (Ítalía) - 15.200 stig

Hoffenheim (Þýskaland) -15.100 stig

Real Madrid (Spánn) - 12.800 stig

Styrkleikaflokkur 4

Z. Kharkiv (Úkraína) - 9.100 stig

Servette (Sviss) - 7.600 stig

Köge (Danmörk) - 6.900 stig

Benfica (Portúgal) - 5.600 stig


Tengdar fréttir

Vilhjálmur: Í seinni hálfleik var þetta aldrei spurning

Vilhjálmur Kári Haraldsson, þjálfari Breiðabliks, var að vonum ánægður eftir að liðið tryggði sér sæti í riðlakeppni Meistaradeildar Evrópu með 3-0 sigri á Osijek á Kópavogsvelli í kvöld.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.