Innlent

Tugir í sýnatöku eftir að tveir nemendur greindust smitaðir á Ísafirði

Kjartan Kjartansson skrifar
Tugir fóru í sýnatöku á heilbrigðisstofnun Vestfjarða vegna smitanna í grunnskólanum á Ísafirði í morgun.
Tugir fóru í sýnatöku á heilbrigðisstofnun Vestfjarða vegna smitanna í grunnskólanum á Ísafirði í morgun. Vísir/Vilhelm

Tveir nemendur í 1. bekk Grunnskólans á Ísafirði greindust smitaðir af kórónuveirunni og hafa tugir verið sendir í sýnatöku og sóttkví vegna þess. Engir fleiri hafa greinst smitaðir í þeim hraðprófum sem hafa verið tekin í dag.

Smitin í grunnskólanum tengjast því að tveir starfsmenn Hraðfrystihússins Gunnvarar greindust smitaðir af veirunni í síðustu viku, að sögn Gylfa Ólafssonar, forstjóra Heilbrigðisstofnunar Vestfjarða.

Stór hópur mætti í sýnatöku í morgun og er þegar búið að flytja þau sýni til greiningar í Reykjavík. Fleiri sýni verða send síðar í dag til greiningar í kvöld. RÚV segir að áttatíu manns séu í sóttkví vegna smita nemendanna.

„Ekkert af hraðprófunum sem voru tekin í morgun og komið er út úr voru jákvæð sem bendir til þess að þetta sé ekki mjög dreift,“ segir Gylfi.

Samkvæmt nýjum reglum um sóttkví þurfa aðstandendur barna sem lenda í sóttkví ekki að fara í sóttkví. Þeir þurfa að viðhafa smitgát ef þeir mæta í skóla eða vinnu. Gylfi segir að mun fleiri hefðu þurft að fara í sóttkví ef eldri reglur væru enn í gildi.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×