Sif var ekki valin í fyrsta landsliðshóp nýs landsliðsþjálfara, Þorsteins Halldórssonar, enda ekki í neinni leikæfingu. Hún ætlar sér hins vegar að komast aftur í landsliðið og bæta við þá 82 landsleiki sem hún hefur spilað.

„Ég fann það alveg í fyrra, áður en ég átti, að ég er ekki alveg búin með landsliðinu. En svo er það bara Steina að velja mig þegar þar að kemur,“ sagði Sif í samtali við Vísi.

Sif verður 36 ára um miðjan júlí. Hún telur sig geta hjálpað landsliðinu á næstu árum.

„Það er markmið en fyrsta skrefið er að koma mér til baka með Kristianstad. Og ef ég stend mig þar veit ég að ég banka á einhverjar dyr. Ég er alls ekki búin að loka dyrunum að landsliðinu. Það er ofboðslega spennandi uppbygging þar og ég held að ég gæti aðstoðað með eitthvað þar, með mína reynslu. Kári Árnason hefur alveg sýnt að maður getur spilað langt fram eftir,“ sagði Sif sem er þremur árum yngri en Kári. 

„Ég á allavega tvö til þrjú ár eftir,“ bætti Sif við og hló. „Ef mitt tímaplan heldur og ég verð komin í mitt fyrra form í haust ætti ég að geta látið vita af mér þá. Svo er það landsliðsþjálfaranna að velja hópinn.“

Sif leist vel á það sem hún sá til íslenska liðið í vináttulandsleikjunum gegn Ítalíu fyrr í þessum mánuði.

„Steini notaði marga leikmenn sem hafa ekki spilað mikið með landsliðinu. Mér fannst liðið skipulagt og agað og það var ofboðslega gaman að sjá alla leikmennina sem fóru í atvinnumennsku í vetur. Þeirra leikur hefur þróast mjög hratt sem er jákvætt og rosalega gott fyrir landsliðið,“ sagði Sif.

„Mér fannst þetta líta rosalega vel út. Það var gott að fá þessa leiki áður en undankeppnin hefst í haust og svo er enn heilt ár í EM.“