Fótbolti

„Trúðafélag“ Valdimars og Ara

Sindri Sverrisson skrifar
Valdimar Þór Ingimundarson og Ari Leifsson eru liðsfélagar hjá Strömsgodset og voru það einnig hjá U21-landsliðinu og Fylki.
Valdimar Þór Ingimundarson og Ari Leifsson eru liðsfélagar hjá Strömsgodset og voru það einnig hjá U21-landsliðinu og Fylki. Instagram/@stromsgodsetfotball

Það hefur mikið gengið á í herbúðum norska knattspyrnufélagsins Strömsgodset undanfarið en nú er nýtt þjálfarateymi tekið við eftir að Daninn Henrik Pedersen hætti.

Pedersen og Strömsgodset tóku þá sameiginlegu ákvörðun að hann myndi hætta hjá félaginu eftir ásakanir um kynþáttaníð í garð leikmanna og starfsfólks hjá félaginu. Pedersen segir ásakanirnar algjörlega úr lausu lofti gripnar en að hann hafi kosið að stíga til hliðar til þess að lægja öldurnar.

Samvkæmt TV 2 sendu nokkrir leikmenn Strömsgodset bréf til stjórnar félagsins þar sem þeir óskuðu eftir því að Pedersen yrði látinn fara. Ari Leifsson og Valdimar Þór Ingimundarson eru í leikmannahópi Strömsgodset en ekki er ljóst hvaða leikmenn komu að því að senda bréfið.

Nýr þjálfari fundar með hverjum leikmanni

Björn Petter Ingebretsen og Håkon Wibe-Lund, sem var aðstoðarþjálfari Pedersens, mynda nýtt þjálfarateymi Strömsgodset. Ingebretsen er öllum hnútum kunnugur hjá Strömsgodset eftir að hafa áður þjálfað liðið 2018 en þá var hann einmitt með Wibe-Lund sér til aðstoðar. Ingebretsen harmar það hvernig félagið hefur litið út í fjölmiðlum síðustu daga.

„Fyrir mig, séð utan frá, þá er Strömsgodset núna „trúðafélag“. Við verðum að ná tökum á því. Safna öllum saman. Sameina leikmennina,“ sagði Ingebretsen á blaðamannafundi í dag.

„Ég mun funda með hverjum leikmanni fyrir sig í dag, fá þar fram það sem þeir vilja tjá sig um, hver afstaða þeirra er og hvað þeir hafa fram að færa. Núna þurfum við á hjálp frá öllum að halda. Þetta er erfið staða fyrir félagið,“ sagði Ingebretsen.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.