Fjögur fyrstu mörkin og þrjú fyrstu stigin á þjálfaraferli Arnars: Sjáðu myndirnar

Íslenska landsliðið komst loksins af stað í undankeppni HM 2022 með sannfærandi sigri á Liechtenstein í Vaduz í kvöld. Íslenska liðið varð að vinna og gerði það sem til þurfti til að enda þennan landsleikjaglugga á góðu nótunum.

Eftir markaleysi og stigaleysi í fyrstu tveimur leikjunum var gott að fá mark snemma. Birkir Már Sævarsson og Birkir Bjarnason komu íslenska liðinu í 2-0 í fyrri hálfleik og eftir það var leikurinn og um leið stigin þrjú í öruggum höndum íslenska liðsins.

Guðlaugur Victor Pálsson og Rúnar Már Sigurjónsson innsigluðu sigurinn og landsliðsþjálfaraferill Arnars Þórs Viðarsson er vonandi kominn í gang eftir vandamálabyrjun.

Hér fyrir neðan má sjá nokkrar góðar myndir frá leiknum í Liechtenstein í kvöld.