Getur unnið fyrsta sigurinn á sama stað og hann fékk skell í síðasta landsleiknum

Íslenska karlalandsliðið í knattspyrnu hefur spilað tvo leiki undir stjórn Arnars Þórs Viðarssonar og tapað þeim báðum án þess að skora. Liðið verður að vinna leikinn á móti Liechtenstein í kvöld ætli það að gera eitthvað í þessari undankeppni.

Örlögin haga því þannig að fyrsti sigur Arnars Þórs sem landsliðsþjálfari gæti komið í hús á sama leikvangi og hann spilaði síðasta A-landsleiksleik 17. október 2007. Báðir leikirnir eru meira að segja á miðvikudegi.

Svartur dagur í sögu íslenskrar knattspyrnu

Arnar á hins vegar ekki góðar minningar frá leiknum á Rheinpark Stadion fyrir rúmum fjórtán árum síðan. Íslenska liðið tapaði leiknum 3-0 og þetta er einn svartasti dagurinn í sögu íslenska landsliðsins. Mario Frick kom Liechtenstein í 1-0 á 28. mínútu og Thomas Beck bætti síðan við tveimur mörkum á 80. og 82. mínútu.

Beck skoraði 40 prósent landsliðsmarka ferilsins á þessum tveimur mínútum. Arnar og félagar horfðu upp á Liechtenstein fagna einum stærsta sigri í sögu þeirra landsliðs.

Þetta var hans 52. landsleikur og Arnar lék allan leikinn á miðju íslenska liðsins. Í framlínunni var aðstoðarmaður hans í dag, Eiður Smári Guðjohnsen, sem þá var fyrirliði íslenska liðsins. Eiður Smári átti eftir að spila í landsliðinu í níu ár í viðbót en jafnaldri hans Arnar Þór Viðarsson endaði þarna landsliðsferilinn 29 ára gamall.

Ólafur valdi aldrei Arnar Þór

Eyjólfur Sverrisson stýrði íslenska liðinu þarna í síðasta sinn og Arnar Þór var ekki valinn í liðið þegar Ólafur Jóhannesson tók við landsliðinu. Arnar Þór lék sem atvinnumaður í belgísku deildinni til vorsins 2013 en síðustu fimm tímabilin voru með Cercle Brugge.

Martin Stocklasa, þjálfari Liechtenstein í dag, lék einnig þennan leik en hann var í vörn liðsins sem hélt marki sínu hreinu. Þetta var hans 71. landsleikur en þeir urðu alls 113 talsins.

Stocklasa tók við landsliði Liechtenstein af Helga Kolviðssyni fyrir þessa undankeppni eftir að hafa eins og Arnar, þjálfað áður 21 árs landslið þjóðarinnar.