Ekki lengur þörf á að tilkynna fæðubótarefni né íblöndun koffíns í litlu magni

Hólmfríður Gísladóttir skrifar 18. mars 2021 14:02

Áfram þarf að fá leyfi fyrir markaðssetningu drykkja sem innihalda mikið magn koffíns.

Matvælaframleiðendur og dreifingaraðilar þurfa ekki lengur að tilkynna markaðssetningu orkudrykkja sem innihalda minna en 320 mg/l af koffíni.

Þetta kemur fram á vef Matvælastofnunar en þar er greint frá því að tilkynningarskylda á fæðubótarefnum annars vegar og íblöndun vítamína, steinefna og tiltekinna annarra efna í matvæli hins vegar, hefur verið felld niður.

„Athugið að ef drykkjarvara inniheldur hærra magn koffíns en 320mg/l þurfa matvælaframleiðendur eða dreifingaraðilar áfram að sækja um leyfi fyrir íblönduninni til Matvælastofnunar. Í þessum tilfellum er ekki um tilkynningarskyldu heldur um leyfisveitingu að ræða,“ segir á vef stofnunarinnar.

Þar segir einnig að tilgangurinn með tilkynningarskyldunni hafi verið að hafa yfirsýn yfir þau matvæli sem markaðssett eru á Íslandi.

„Móttaka tilkynningar fól því ekki í sér samþykki Matvælastofnunar fyrir tilkynntri vöru. Það eru matvælafyrirtækin, þ.e. stjórnendur þeirra, sem bera ábyrgð á því að matvælin sem þau framleiða og/eða dreifa séu í samræmi við gildandi reglur. Því er mikilvægt að kynna sér vel gildandi reglugerðir áður en markaðssetning matvara hefst á íslenskum markaði.“

Neytendur Matvælaframleiðsla Orkudrykkir

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.